頭泥知多D

唉!! 第一次做爸爸媽媽真係咩都唔識…BB早在兩個月時就有頭泥, 以為唔使理, 原來BB可能會唔舒服㗎!! 頭泥是BB有油脂性皮膚炎，使頭部產生分泌，積聚而成。這情況十分普遍，可以用BB油、橄欖油在沖涼前替他抹頭，坊間亦有一D去頭泥嘅洗頭水，加快頭泥的消失。今次我哋又上一課喇!

拍咗咁多BB得意嘅相, 媽媽今次請佢個朋友- 小花叔叔用佢部靚相機影BB另外一面。好勁呀~~隻眼影到水汪汪,連腳指都影得咁靚仲有腳紋添!!! 牟利呀!!! 多謝劉小花叔叔~~
P.S. 頭泥嗰張相都係佢影!不過就咁睇睇唔清楚d頭泥, click張相先睇到, 大家研究吓啦!

三個月

三個月對BB來講好似好重要, 嘛嘛話BB仔喺3個月大就會易湊D, 因為佢會訓得好D喎。其實BB兩個月時已經戒咗夜奶, 我哋可以訓超過4個鐘, 宜家希望佢夜晚可以一覺訓到天光就好喇!!!!
爸爸早兩日同個師姐食飯, 傾開計先知原來阿仔三個月大同佢六個月大的囝囝體重一樣呀~~~BB你好勁啊 :P
咦~~爸爸同姨姨影到3個月大的BB好趣緻呀!

學習第一課

BB除咗喊, 飲奶, 訓覺…而家要學習好多嘢!! 第一課係頸仔要識擔起, 步驟係將BB “扒”低, 觀察佢條頸有冇力抬起。好似相中的BB 就攞滿分喇!! 不過佢好懶, 只係維持咗一陣就被自己隻手吸引住, 放個頭上隻手度啜。其實早就在平時掃風時, 頭仔已硬正到撐住望佢鍾意啲目標lu 。



而第二課係要學翻身, 呢個項目對頭大和肥的BB會困難D…………而家幫佢打側身, 佢郁都唔郁, 只係好興奮咁向上望~~~~BB你要加油呀!!!

啜手指

啜手指係BB安撫自己的行為, 咪以為個個BB都天生識啜呀!! 睇吓阿仔齋啜食指同拳頭, 成日好似做操口手勢都算啦, 仲會食食指食到扣自己喉添……點算呢? 好唔好引導佢啜返手指公呢!!

出浴照

出浴照係每個BB必有嘅相, 要影到既唔露點又可愛就要睇呢張相喇。你哋話係咪先? 沖完涼裝出一個期待的樣, 唔知唸緊嘜?

接近3個月的BB開始不停講BB話, 原來BB話真係有"un cu cu" , 但講呢講去都係同個"cu"字有關, 例如 "ah cu", "cucu","cu........" 。佢次次講度一"倫"咀, 好似好多嘢發表, 我哋聽唔明唯有答佢 un cu cu ah cu cu.....................cu 到好似鬧交咁佢就開心晒 :)

手仔大解放

3月17日大解放喇!! 之前因為怕BB隻手抓到自己要做花面貓, 所以有嘢保護住手仔,不過爺爺話BB唔可以唔睇吓自己隻手。媽媽有見及此就解放BB隻手仔出來, 然後再清潔(原來隻手焗得耐可以好嗅㗎!)。 自己第一次攞玩具, 唔係BB自願㗎!! 爸爸好落力俾佢握住, 我唸BB係無感覺,因為佢顧住望頭上嘅轉轉玩具, 興奮到“fing”甩咗都唔知。
講到衫仔……好多人送咗好多衫褲俾BB, 有冬天有夏天嘅! 不過最有心思係媽媽的朋友-雪梨姊姊親手織嘅冷背心…睇吓BB著咗幾型仔!

兩個月

兩個月大嘅BB開始圓碌碌, 面子仲肥嘟嘟、滑溜溜, 唔止有笑臉,仲識得裝出一副傻“更更”的樣子。爸爸成日話佢似臘筆小生, 唔知係咪哩個樣呢?

滿月喇!!!

滿月BB著住婆婆送嘅衫, 望落去大個仔晒!

3月8日BB開始識得狂笑, 呢個表情係食飽咗爸爸同佢講嘢!!笑到個口真係幾大:p ......睇到呢張相冧晒!

飲奶實錄

人仔細細,一肚餓就喊到拆天, 餵奶時仲立刻護住個奶樽唔放, 飲到一半先放軟手腳, 飲飽仲識笑呀~~ 一到掃風就唔郁lu

洗白白

BB沖完涼會噴泡玩口水, 亦不忘望鏡頭

出院返屋企

出世六日終於回家了~~~~原來BB鍾意舉手投降, 肚餓仲會“嘟”長個咀添

BB要出世喇!

只有36週大的BB真係百厭, 未足月就趕住出來逗利士, 2006年1月12日零晨1時, BB在媽媽肚中百厭到穿咗羊水仲見埋紅………爸爸被媽媽驚叫聲嚇醒了! 狼狽的爸爸媽媽立即趕快執拾走佬袋入院。到達醫院已經係零晨2點多, 姑娘檢查過話無咁快生得, 足足驚到早上7時醫生來到先決定打針催生, 生仔的陣痛就開始喇~~~~ 相中的圖係陣痛的波幅, 聽住BB心跳可以知道陣痛的來臨, 初初覺得好興奮、刺激、期待, 嘩!! 痛咗半日後都未生得真係嘜心情都冇。到咗下午1點知道要開才刀拿BB出來簡直覺得解脫。 下午2點15分BB出世喇!!! 6磅半在溫箱裏已經望鏡頭喇~~~~~

肚中的BB

現在的科技發達, 4D超聲波可以睇到BB的樣, 滿足到準爸爸媽媽的好奇心呀~~~~在肚中五個月大的BB, 五官已經似爸爸喇!