泳班考試

上完3個月嘅泳班今日有個考試, 爸爸媽媽覺得好緊張唔知考咩呢? 今日頭半個鐘係練習, 原來考試有3個頂目:
1. 水中呼氣超過15s (平時天諾練習, 只係一時時做到, 到咗考試一take過ok喎!
2. 用浮板游5米 (呢項完全冇問題)
3. 冇任何輔助工具下一口氣自己式手撥4下,向前游大概4米 (最後的項目是最難, 天諾練習時做唔到架, 手腳又唔多協調, 不過到咗考試, 天諾好似知道唔衰得咁, 勉強又好似做到呀!)
見佢玩得咁開心, 爸爸媽媽決定幫佢報多兩個月, 泳班會玩到10月呀!!

每次上完泳班都食晒一個double cheese burger, 好食得呀!!

開學喇~~

今日爸爸媽媽一齊陪佢返學, 聽完老師講解K2真係大個仔喇, 返學唔太hea對小朋友嘅紀律要求亦高咗, 每日有兩份功課,老師唔會响功課上蓋日期印來提家長, 小朋友要自發去做, 希望天諾做得到啦 …….面對新面孔新班房新老師, 天諾都好好奇,天諾有3位K1同學仔編响同一班, 其中有兩位更安排坐同一枱, 希望天諾適應新學年同享受幼稚園生活啦~~

暑假最後衝刺~~

呢個星期係暑假尾聲, 爸爸媽媽都冇帶兩兄妹外遊, 除了游水亦冇安排其他節目, 咁就完咗個暑假好似有d失色………所以星期二請假帶兩個b去廸士尼玩吓…….可惜菲律賓人質事件(主因)同天氣關係大大減低去廸士尼嘅意欲, 為免天諾失望我哋帶咗佢哋去mega box play house, $40蚊入場費抵玩啦!!

到星期四(返學前一天), 我哋終於去咗廸士尼喇~~
短短車程時間, 兩兄妹已興奮不已, 不斷同Auntie Alma講英文介紹沿途風景, 見到路牌有廸士尼標誌就同auntie講 (look auntie there is Mickey mouse sign), 又話we go far away, the cloud is so big…….攪到妹妹都跟住講auntie look….mouse….哈哈笑c人呀!!

一入場先玩哥哥至愛-馳車天地, 好彩妹妹啱啱夠高(>81cm)可以一齊玩, 再去巴斯光年館, 哥哥居然拒絕入場仲聲稱以前玩過唔去喇…..唉!!真細膽啊~~相反妹妹玩咗兩次…..食過快飯剛好睇巡遊, 妹妹睇得到好high,但哥哥就唔鍾意d太大聲嘅音樂…..跟住再玩其他……. 總括天諾仍然好怕入黑蚊蚊同有音樂嘅室內, 但有進步嘅係敢獨自同巴斯光年合照, 而妹妹方面, 勇字行先咩都唔驚, 應該係最enjoy嘅一個!!

P.S. 去到尾聲天諾拖住媽媽講:媽媽好開心呀, 多謝你帶我來玩呀!......呵呵~~好窩心呢!

5B同行游水樂

好難得今日約埋大細表+天行同天諾天穎去游水, 五個b當中游水最勇嘅天諾繼續周圍表演, 天諾仲愛上水底拍攝呀; 天穎著咗佢第一件比堅尼, 成日要爸爸同佢去玩泳池入口個沖身位; 細表表氹吓氹吓落水就冇問題; 大表表呢一於你有你叫, 佢有佢自由玩唔多落水; 天行呢個樣唔多願意唔多enjoy, 不過氹佢落水總算ok既!!

Playgroup swimming

今日妹妹嘅playgroup主題-游水, 雖然玩水好開心, 但唔知點解妹妹冇同其他小朋友交流, 今日仲有哥哥來接放學, 天穎見到哥哥堂都唔想上即刻出去搵哥哥呀!!

下水前熱身

妹妹學生照

話咁快就要準備幫妹妹報K1喇…….細女報一d稍有名氣嘅KG確實比天諾(大仔)果時成功的信心冇咁高, 不過點都會試咗先, 爸爸媽媽始終相信語言越早學越好!! 今日先來幫妹妹影學生照先, 唉~~雖然有d勞氣, 但見到相裡面嘅可愛天穎又點嬲得出呢!! 最後總算影到啦~~

游泳班@香港遊艇會

爺爺幫天行天諾8月份報名遊艇會嘅泳班, 今堂係第三堂, 媽媽今日先有時間去睇吓, 鬼佬教法真係同泳會唔同, 完全冇輔助工具, 只係有d小玩具來氹住怕浸過頭嘅天行, 全程Mr. Robin都要抱住先肯落水, 天諾呢就係池邊坐住跳落水游向2米左右, 由Mr. Robin執返佢上來, 哈哈~~練大d個膽, 唔錯唔錯………..今日仲帶埋妹妹去, 個膽唔練己經好大, d水由頭淋落來都冇有怕, 睇下呢張相天行都唔敢行近水柱, 天穎已兜頭淋咗一輪lu…………..

p.s. 由於爺爺今日忙住覆email, 爸爸媽媽睇住3個b真係攰到……好彩天行天諾肯自己食飯, 我哋先有飯食!

N班同學仔游水party

好開心再見番天諾N班d同學仔呀! 天諾有同學仔一齊游水亦特別興奮, 一去到天諾已認得條”sir滑梯”仲第一時間拖媽媽去玩,玩 頭三次仲係攬住浮板自己沖落去, 佢咁肯去試d新野呢一點真係要讚吓, 雖然玩咗3次就開始有d怕怕唔玩, 但願意踏出第一步去試 已經叻叻lu……….玩到尾聲見d同學仔有媽媽陪玩滑梯, 佢又話要玩, 媽媽梗奉陪啦~~

Tia reading books

今晚天穎好有心機讀書, 可能知媽媽錄影所以讀完一本就話next, 跟住自己去拎第二本書再讀, 雖然讀音不準, 但都好叻叻啦~~

Daily life book

You can do it

Counting

Swimming after雷暴警告

今朝一早諗住約埋Ian一齊去爺爺嫲嫲度游水, 點知雷暴警告冇得游, 响爺爺屋企hea咗成朝, 3個b咩都爭一餐, 最開心應該係跳嫲嫲張床, 哈哈呢個video好攪笑, 影到Ian推妹妹, 妹妹馬步好穩冇跌,而天諾就見狀錫返妹妹, 但妹妹又唔show佢....

等咗成朝終於有水游喇~~天諾成日以為自己識游水, 攬住支水鎗就跳落水, 連妹妹都好大膽呀, 企响池邊唔駛人扶住都敢跳落水, 真係名乎其實嘅百厭妹喇~~~

Playgroup第二課

今朝起身即刻帶天穎去playgroup, 呢堂天穎好有進步, 導師教嘅動作都有跟住做, 但係所有靜態活動就有d失控, 唔肯坐定定聽故事和做手工....不過見佢大部分時間都係開心既!!

上完堂同佢去playground玩吓, 仲玩到唔願走呀~~

睇tube

姨媽上來搵兩兄妹玩, 天穎一見到姨媽就即聯想到iphone, 大大聲同姨媽講"姨媽睇tube" tube=you tube呀........哈哈為咗睇tube, 原本唔願食飯都大大啖食lu

爺爺Happy Birthday

今日放咗工接天穎去同爺爺慶祝生日, 一如以往天諾天穎最雀躍係蛋糕出場呀! 不過影相時天行走來走去, 响個video度人哋唱生日歌時, 後面走過既細佬咪係天行囖!......今晚天諾好攪笑蛋糕出場時一臉驚喜, 當見到個蛋糕時大叫一句"嘩~咁細個嘅!!" 哈哈笑c人呀...

探太公

今日約埋表表同公公婆婆返大陸探太公, 妹妹就托爺爺嫲嫲照顧, 聽叔叔同嬸嬸講妹妹超百厭, non-stop moving攪到個個都好攰, 真係辛苦各位喇~~ 而天諾呢好乖, 識問候太公, 大人傾計時佢就同表表玩火車, 叔公又爬上門前嘅龍眼樹摘龍眼俾我哋食, 即摘即食yummy, 天諾最鍾意咁樣玩推車仔!!

天穎的第一堂playgroup

天穎第一堂playgroup响19個月先開始,媽媽真係有d內疚, 不論時間同心思都冇天諾細個果時安排得咁好~~
唔知天穎係咪慣咗冇約束, 成堂好有性格唔聽人講自己鍾意點就點, 仲成日指住門口叫”走”, 最鍾意係去洗手, 佢太百厭lu……媽媽一個人睇實佢都冇時間影相tim…..希望佢下次佢可以玩得投入d啦~~

Ian 3 years old birthday

今日放工接兩個兄妹去mega box 參加Ian生日飯局, 有蛋糕食天諾梗開心啦, 有街街去天穎好興奮, 天行今日特別乖, 肯分享玩具俾哥哥同妹妹, 食飯期間3個b各自各精彩表演, 食完飯去mega kids就周圍走, 玩得好開心呀!!

媽媽舊同事飯聚

天諾聽到媽媽有飯局, 又話要跟住來, 見係暑假, 同佢出吓夜街啦~~好彩成晚都算乖, 只係去咗兩次洗手間而離開坐位, 到飯局尾聲, 天諾仲當攝影師幫我哋影相留念呀~~叻叻!!

Swimming day

今日即興去表表會所游水, 天諾身高已過1米, 响中池可以踏地好自如玩水, 仲當自己係教練, 成日示範俾妹妹同表表睇, 經呢個”流”教練示範完, 妹妹同表表都學佢”吹水”, 大家都好大膽咁跳水呀~~哥哥仲成日抱住妹妹响水度行, 又要求爸爸媽媽放手俾佢自己照顧妹妹, 好啦! 見佢咁有信心就俾佢試吓, 當然爸爸媽媽”磅”住啦, 行唔夠3步妹妹飲咗啖水後唔肯再俾哥哥抱呀, 哈哈!!