搗亂@媽媽office

星期六兩個b來接媽媽放工, 响媽媽個位搗亂一番後齊齊出發去搵爺爺嫲嫲飲茶…….
之後送咗妹妹返屋企再送哥哥去學游水,話咁快天諾已學咗接近兩個月喇~~雖然天諾成日同媽媽講唔鍾意學游水, 但每次上堂佢都表現得好開心喎, 今日教練開始要天諾”味”水踢腳之餘仲要唔用浮板學潑手,天諾嘅手腳再加上呼吸動作未協調到, 成套動作好惹笑, 但唔知點解最尾5分鐘突然開竅, 可惜已快落堂, 希望佢下次記得個動作啦!!

舊玩意

依家d小朋友物質豐富, 基本上要咩有咩, 雖然一屋都係玩具, 但每晚天諾仲會問”媽媽今晚玩好呢?”…有玩具又唔玩,晚晚咁問媽媽, 唉!邊有咁多花臣同你玩呀!! 今晚就同佢玩舊玩意, 媽媽小時冇波波池或玩具屋, 只係用一張被掛高就當帳篷玩…..哈!今晚呢套野又玩得佢哋好開心喎!

大懶豬

呢幾日一家四口齊齊瞓確實瞓得嫲嫲哋, 天諾唔知係咪太興奮妹妹轉咗房, 呢幾日都7點左右起身, 見大家攰攰哋今日同公公婆婆飲完茶行一陣就返屋企休息, 難得一向抗拒瞓晏覺嘅天諾都肯瞓, 咁就齊齊午睡啦~~結果爸爸媽媽瞓咗粒半鐘, 妹妹3個鐘, 天諾呢瞓到兩個鐘扎醒話唔瞓lu.點知媽媽話夠鐘去足球班佢即刻再瞓返!!(唔知係咪上星期俾教練話佢做後衛唔可以用手攞波, 攪到怕咗教練唔想上堂呢, 結果呢個星期走咗堂tim~~)成家做咗大懶豬!

領獎日

話說上星期天諾參加嘅普通話朗誦今日舉行頒獎禮, 爸爸有公事在身, 媽媽就帶天諾坐巴士過海(oh~原來第一次同佢搭隧巴啊~~), 不過好日唔搭, 一搭就上咗架壞冷氣嘅車, 又焗又熱最後巴士公司安排咗另一架車响隧道口轉車, 雖然車程有d阻滯, 但冇影響天諾心情, 天諾一見同學仔Ambrose已好開心,拎住個獎仲開心呀!!

今朝天諾天行天穎同爺爺嫲嫲飲茶, 大個仔天諾事事讓妹妹(可能佢清楚乖就有玩具買啦!), 睇吓哥哥讓咗rocket同雨傘balloon俾妹妹, 妹妹幾得戚~~hehe~~天行照樣我行我素!! 喂~你哋三個點先企定定影張靚相呀!!!

Auntie 病倒了

由於工人姐姐病咗, 為咗俾佢有優質睡眠, 妹妹搬到爸爸媽媽房瞓, 今次係自天穎出世媽媽坐月後再次一家四口齊齊瞓, 天諾超級興奮要爭住瞓妹妹隔離, 但為免兩個瞓覺有無情力傷及對方, 爸爸媽媽梅花間分開佢哋瞓, 每次天諾扎醒都爬過媽媽瞓妹妹隔離呢~~~

我家小公主

妹妹開始識貪靚, 今日買咗新公主睡依俾佢, 哈哈~~居然試著完唔肯除返出來!!

暑假班take 2

上星期叫停咗暑假班之後, 星期一復課, 因為怕佢扭計唔去媽媽專登lunch time趕返屋企送佢去中心, 見妹妹好番好多帶埋佢去支持吓哥哥, 妹妹可能太耐冇出街lu, 表現得極度興奮仲想跟哥哥入課室, 尋日天諾都ok冇抗拒, 今日就好扭計同媽媽講數唔肯出門口, 最後都係要媽媽返去氹佢呢, 半推半氹之下入課室, 落堂後問佢好唔好玩, 佢話好玩但又話唔想去, 真吹脹!!

天諾好乖+天穎好嬲

今日下午由於天穎要午睡, 我哋帶走天諾同爺爺嫲嫲食飯, 天穎見到爸爸媽媽同哥哥出街, 即刻攬實爸爸叫住”鞋鞋”(要我哋幫佢著鞋去街), 最後知道自己冇得去喊得多麼淒涼呢!! 攪到爸爸媽媽好內疚~~出到街天諾都好乖, 食完野探太嫲又肯表演. 不過都會扭計買玩具, 呢個習慣…..唉…..媽媽開始半投降!!

嗱嗱林買完玩具爭取時間返屋企同天穎玩, 再同公公婆婆食飯, 晚飯時間天諾表現得好乖呀, 梓昊舅父仔好細心,記得天諾鍾意食冬菇專登夾俾佢食, 天諾亦識回禮夾返西蘭花俾舅父仔, 兩個都好gentleman啊!

食完飯返到屋企, 平時放工天穎一見到爸爸媽媽即刻笑.叫同扭抱, 今晚開門見到一個嬲樣嘅妹妹, 成晚久唔久嘟咀拍嬲, 好似向爸爸媽媽展示不滿呢, 但其實佢個嬲樣好可愛同攪笑, 好想影低佢呀, 佢又好唔合作只係隱約見到個嬲樣….

爺爺嫲嫲返來喇~~

去咗3個星期旅行嘅爺爺嫲嫲返來喇,今早諗住帶天穎去接機, 點知發現天穎有微燒, pat pat仲出咗d好似水痘咁嘅粒粒, 好大機會係支針嘅反應, 好彩佢精神好好,而d粒粒集中响pat pat度, 呢兩日放假要响屋企冇街去……

天諾呢今日再度比賽, "第二屆全港青少年普通話綜藝評選賽", 呢個比賽係邀請曾經參加過公開比賽達到優異水平嘅小朋友參加, 雖然報名費$380, 但每位參賽小朋友都會獲發證書及獎盃, 一向喜歡piston cup嘅天諾聽到有獎盃好興奮咁應承媽媽參加, 真好唔駛氹佢自己樂意參加!!
講番個比賽, 可能係精英賽, 各小朋友都好有水準,睇得出佢哋上過training class呢, 而天諾幾次比賽都是爸爸媽媽操刀訓練, 天諾表現出平時水準已經好叻叻 hehe~~其實最開心係見到每次都有進步, 唔知佢係咪有經驗, 做動作都自然咗,朗讀得似模似樣!! 比賽尾聲, 大會安排評委導師花咗半小時, 指導每位小朋友同俾comment, 媽媽好欣賞呢, 有專業人士提供意見好讓我哋下次改進!!
Tim's performance

comment!

欺凌事件?

第二日暑期班, 上咗兩個鐘後媽媽收到電話, learning centre嘅姐姐話天諾响廁所跌倒喊到唔收聲, 仲嚷住要返屋企, 好彩auntie amor有時間幫手接佢啫! 返到屋企冇啦啦發燒, 問佢發生咩事, 天諾聲稱自己被人打, 個頭好痛, 為了解清楚, 媽媽打電話去centre問事發經過, 一問之下原來當時上完畫班小朋友去洗手間洗手, 天諾與其他3個小朋友一馬當先, 姐姐隨後跟住但到達時天諾已坐在地上哭, 當時冇大人見到事發經過, 其實小朋友跌跌碰碰好平常, 但有點兒失望centre嘅安排及善後, 其實轉堂時間應該有嬸嬸响洗手間睇住, 即時阻止唔到意外發生都起碼得個知啦~~~
呢晚天諾都發住燒, 仲發現手背有d紅粒粒, 第二朝即去睇醫生, 醫生話少少喉嚨發炎, 手上紅點唔似手足口, 應該係敏感喎, 媽媽即刻問會唔會係d顏料呢?醫生話有可能架, 泥膠水彩皂液最好唔好掂住, 所以暑期班要叫停, 下星期再開始!!

電動車

公公响深圳買咗架電動警車俾d小朋友玩, 由於表表北上陪佢daddy, 天諾就先抬架車返屋企玩下先, 今日係暑假第一日, 爸爸媽媽都請咗一日假帶天諾返暑期班, 上午有d時間帶兩兄妹落街玩吓, 好彩妹妹借天行架單車坐吓, 如果兩個細佬一架車, 妹妹一定喊住打哥哥要哥哥讓佢呀!!

睇吓哥哥做v字手勢, 妹妹由學到足!!

Eee…….妹妹呢個髮型揸住單車似唔似IQ博士嗰個……唔記得佢叫咩名tim:p

兩個B玩咗一陣, 妹妹返屋企瞓晏覺瞓足3粒鐘, 哥哥就去返第一日暑期班, 3個小時課程, 每小時仲有不同元素, 問天諾好唔好玩佢又話好玩, 仲話自己係班中最細, 希望佢响餘下三星期都開心去上堂啦!!
送咗哥哥返屋企, 就帶咗妹妹去打歲半針, 今次仲打埋水痘針, 今日可能好夠瞓, 全程俾醫生檢查都好乖好叻冇喊過, 到咗打針時間先喊一陣, 又係左右脾各一針呀, 妹妹加油呀!!

妹妹新髮型

天氣炎熱, 經各人催促下, 媽媽今日出手幫妹妹剪頭髮, 妹妹都算合作, 剪完後面剪前面, 每次剪完讚佢叻叻佢就唔郁等媽媽繼續剪, 但媽媽真係唔太識剪喇~~結果似小丸子?萬寧妹妹?草菇?定八兩金呢? 總之媽媽唔太滿意啦……下次都係捉佢去髮型屋剪至得!

第二次普通話朗誦比賽

今次幫天諾報咗由GAPSK舉辦嘅朗誦比賽, 比賽响一間小學進行, 一去到感覺好多人由點名到比賽再等攞分紙都比較混亂, 而且比賽守則多多又禁止影相, 獨誦報名費$290, 確實令再報名嘅吸引力大減!!
今次嘅比賽天諾攞到優異獎(豬肉獎), 都係練吓膽取經驗, 但最大得著係發現天穎會學哥哥表演, 我哋讀出誦詞, 佢好似模似樣咁表演, so cute!!! 連哥哥想一齊show off佢都唔制仲打人呀~~

Tim practice

Tia show time

惡妹出場喇!!!

學期尾聲~~

呢個星期係天諾N班最後一星期lu……上星期已取得學校嘅發展評估報告,從老師評語當中, 好開心見到天諾喜歡每事問又對學習有興趣, 但美勞方面(其實係耐性)要努力呀!!今日特別約埋爸爸媽媽去學校同老師傾吓計, 原來陳老師係第一次見爸爸呢, 而天諾有爸爸接放學特別興奮!! 响媽媽同Miss Abby傾計同時天諾與其他同學仔玩緊, 好開心見到天諾好自律咁用英語同普通話與同學溝通, 連Miss Abby都話呢班同學英文好好, 英文係佢哋用得最多嘅溝通語言, 真係要多謝各同學仔配合天諾嘅oral真進步不少呢!! 普通話嘅進步更明顯啊!!
今日得知原來學校呢一兩星期開始逐步傳遞升班嘅信息, 讓佢哋有心理準備轉老師同同學, 課室..唔怪得天諾呢排成日同媽媽講”我升lower 喇~我想快d升lower呀!”

叔叔8月見!!

今朝同姨媽食過早餐就送叔叔去機場喇~~兩個b不知幾開心!! 叔叔加油呀~~我哋8月見!!

兩個b由機場回程已支持唔住lu, 瞓咗1個鐘一齊同哥哥去學踢波!!踢到尾聲公公婆婆又來睇吓,再一齊食飯!

今日話忙唔忙, 但就見晒表表同天行!

要提吓天諾嘅泳班進度, 今日已經第五堂, 其實打重第三堂起天諾已嚷住唔去學因為佢唔鍾意吹水(學用口响水中呼氣), 每堂warm up時間都喊住, 但玩玩吓又好開心, 今堂有表表來打氣信心大增, 連吹水時間都長咗好多, 學踢水姿勢優美咗, 唔知下一堂佢會唔會喊呢?
今晚天行來玩, 天穎唔禮讓之餘仲打天行爭玩具, 雖然唔係大力打人, 但遇到唔如意就打人, 呢個行為好令媽媽頭痛呢, 天諾已被天穎打到冇感覺, 好怕天穎會慢慢成為習慣呀!!!

天諾心目中嘅姨媽屋

Drawing一向係天諾嘅弱項, 唔係媽媽要求高, 而係天諾冇咩心機坐定定畫, 今晚搵番芬姨姨响日本買嘅畫筆俾佢, 貪新鮮嘅佢又點會放過呀~~佢一邊畫一邊解說, 用咗唔駛十分鐘就有呢幅--姨媽屋企, 媽媽都大讚呀, 對比以前d畫呢一幅媽媽大概估到圖案內容啦!!!佢將幅畫送咗俾爸爸貼响office, 媽媽呻咗一句”我冇喎!”…….hohoho……..第二朝佢一起身就問爸爸拎返copy畫多一張俾媽媽呀! So sweet~~ 乖乖!!如果睇唔明可以有以下解說!

好熱呀~~

今日雖然好熱但 因為妹妹有d鼻水, 哥哥下午有生日會要參加, 所以放棄去游水……….一早起身9點幾就一家起身出發去mega box食早餐, 兩個對兩個實在好攰, 有百厭妹妹响度,呢個早餐吃得好唔容易啊! 好彩哥哥乖自己坐定定食晒~~
到咗黃昏出發去文灝生日會, 天諾好enjoy呀, 不過在睇魔術表演環節, 天諾顯得好膽小唔肯坐近呢, 到蛋糕出場例牌痴住, 食過蛋糕又再同成班同學跑跑跳跳好開心! 哈哈!今日有Anson F. family順風車坐真係唔該晒!!