天諾的第四種語言

廣東話天諾已經掌握而且表達得好好; 英文日常生活用語可以聽得明, 但未講得好好; 普通話只係聽到笑, 偶爾講幾個字, 呢幾日阿b睡前都同媽媽講一段野”b呢叭喇”唔知講咩, 初初以為佢扮bb講bb話, 經尋晚測試迷底終於解開喇~~
天諾: 阿bu叭喇xxxxxxxxxx (講得好快)
媽媽問: bb話來架?
天諾: (唔理)keep住阿bu叭喇xxxxxxxxxx
媽媽問: 表表點講野架?
天諾: 爹爹爹爹…….(答對)
媽媽問: 細佬點講野架?
天諾: un cu cu…….(答對)
媽媽問: auntie alma點講野架?
天諾: 阿bu叭喇xxxxxxxxxx (叮!! 原來係菲律賓話呀!!)
笑到爸爸媽媽肚痛啊~~如果你聽過賓話你一定話佢講得似~~hohohoho

天諾農曆生日

農曆生日當然同埋壽星婆婆一齊慶祝啦! 天諾著咗君姑姐送嘅新衫, 個個都讚型呀!! 飲茶係指定動作, 唔知係咪天諾瞓到成10點先起身好夠精神, 飲茶時冇扭計要離開坐位, 叫佢笑俾我哋睇, 就用以下笑容回應:
含蓄地笑
笑得開心d啦!
笑到見牙
都係自然d好!
飲完茶嘅特備節目-林村一日遊(其實係陪姨媽睇樓), 今日天氣好暖, 天諾玩到出晒汗, 面色仲紅紅地tim…..下午茶去咗荷曄亭食, 餐廳有幾隻鸚鵡叫得好大聲, 天諾聽到又叫埋一份, 不過抱佢行埋d都驚驚呀, 真細膽呵!!
夜晚餐飯就扭計d喇, 成日要走來走去冇時定, 相反表表就好精神咁撩人玩…..
最攪笑係返到屋企公公又上咗來同佢玩, 天諾係咁叫Bob公公玩仲唔俾公公走呀!!
註: Bob公公解作工程師公公, 呢期天諾熱捧Bob the Builder, 有一日公公用鎚仔幫天諾嘅書柜加裝拉環, 天諾自始叫公公做Bob公公, 哈哈, 好有諗頭啊!!

特別安排的一晚

爸爸媽媽已經有年幾冇兩公婆夜晚出街睇戲食飯喇(好辛苦先諗得起對上一次係睇軟硬演唱會呵!)~~幸好今晚有姨媽相助送免費戲票又上門幫手湊天諾, 爸爸媽媽可以去拍吓拖!! 多謝姨媽姨丈姨姨幫手湊仔!!
雖然媽媽好不願意著住睡衣上鏡, 但呢個video最後果5秒實在太惹笑喇!!!!

兩歲生日會

難得天諾正日生日响星期六, 爸爸媽媽幫佢攪咗個pizza hut生日會…..唔知係咪早咗起身, 今朝佢比平時冇咁活躍, 迎賓時佢最活躍係見到雋雋哥哥(仲拖手仔入場tim), 見到恩恩妹妹條裙仔又好好奇咁指住, 細佬同表表就唔駛講啦, 見到面就親親, 哎呀!! 媽媽買咗好多party用品同專登搵同事响disney買咗頂生日帽諗住同天諾裝扮吓, 點知佢唔領情, 唯有向其他朋友仔落手啦~~好成功,個個小朋友响唔反抗之下, 滿足到媽媽!!哈哈!!
學製pizza嘅環節, 天諾同雋雋哥哥都好enjoy, 兩個表舅父鄧腳都好合作(雖然响d相, 見到佢哋有d無奈, 哈哈!)
果日為咗引天諾合作影相, 唱咗好多次生日歌俾佢聽, 唱完又唱, 終於唔知唱到第幾次就冇效lu~好攪笑!!好彩叔叔出動引到佢~
要多謝好多朋友呀! 排名不分先後, 爺爺嫲嫲公公婆婆伯父叔叔嬸嬸天行姨媽姨丈灝b姨丈姨姨大頭蝦姨姨舅父姐姐,兩個表舅父, 君姑姐, 雋雋哥哥family, 恩恩妹妹family, 媽咪嘅三位姊妹(hall姨姨, madam wong, 靜姐姐)
特別鳴謝小花叔叔(唔好意思點你周圍影相, d相好得呀!!)

當姨媽冇到

哈哈! 尋晚姨媽姨丈上來提早送生日禮物俾天諾, 每次姨媽姨丈一齊出現, 天諾只會好冧咁叫姨丈~姨丈~, 我哋叫咗佢好耐佢先叫聲姨媽, 好攪笑!!

尋晚戴住edward叔叔送嘅雪人眼鏡望街燈連天諾都話靚呀!!

Auntie Alma已經返咗來成4日喇, 以為一切會回復放假前~~點解爸爸媽媽仲係冇覺好瞓呢? 事原爸爸媽媽放假時, 每晚天諾瞓前都同佢唱歌仔, 傾吓計, 呢個時侯佢最鍾意stick住爸爸媽媽, 要求瞓响我哋中間, 到佢攰晒就抱佢返bb床, 拍兩拍就瞓著, 呢幾日零晨3點幾佢會企咗响床指住講”瞓中間”, 跟住撲過來zip响我哋中間瞓, oh! Naughty boy~~咁樣爸爸媽媽又點會有覺好瞓呢?

又一攪笑對話

話說尋晚响嫲嫲屋企食完飯, 叔叔揸車送天諾返屋企, 直至返到停車場就黎泊好車, 天諾突然講”叔叔有落”,哈哈梗係呢排多咗搭小巴去婆婆度食飯, 落車就講”有落”喇~~
P.S. 天諾尋晚開始有d鼻水呀, 希望呢兩日好番, 生日會可以最佳狀態現身啦!!

0601 party

今日帶咗天諾去媽媽會2歲生日party同其他1月出生bb一齊慶祝,張大合照只係11-20日出生bb, 成個生日會有成差不多100個B架!! 個個媽媽都話天諾生得高, 睇落佢係全場最高果幾個, 响節目未開始, 天諾已經對個舞台同好有興趣, 成日要我哋帶佢上台行來行去, 望到d禮物又唔捨得行開!! 天諾被抽中玩運波波比賽, 初初擔心佢只玩波唔去運, 點知上到台叫佢做咩就做,好快咁完成動作, 經計時後仲攞第一名(禮物仲係佢响禮物區喉咗好耐嘅mickey mouse拋波波玩具),好開心呀!!! 另外有個行catwalk比賽, 媽媽冇幫佢報名, 但天諾見到d小朋友行佢又lur去玩, 媽媽唯有俾佢企响台邊張臺揸吓咪滿足佢嘅表現慾, 哈哈一樣enjoy!



夜晚成家仲响姨媽屋企攪公公生日會, 天諾就一次過唱晒happy birthday俾1月生日嘅舅父, 公公, 婆婆, 姨姨同自己tim, 好叻叻呀~~表表雖然未識唱, 但佢聽到天諾嘅歌舞都笑同搖擺吓, 好攪笑!

Happy New Year!!

2008年遲咗同大家講Happy New Year!!! 因為媽媽個頭痛咗幾日, 咩心機都冇晒!!
爸爸媽媽設計咗反斗B王2008 calendar做屋企嘅新年禮物, 不過版權問題唔post出來喇!!
其實媽媽13日嘅全職媽媽任務已結束喇, 時間過得真快, 好唔捨得呵~~呢兩日就輪到爸爸接任, 但媽媽病咗爸爸就要一力照顧兩個, 真係辛苦晒~~好彩婆婆間中上來幫吓手, 尋日媽媽返咗工後,爸爸見天諾起身就開咗支奶俾佢飲, 天諾好唔俾面話”唔飲”, 只係對住爸爸扭計睇電視, 然後就喊……..爸爸唯有就範啦~~
要講一d好笑野, 依家爸爸媽媽响天諾面前講野要好小心,因為天諾一聽到想要嘅就lur我哋, 我哋有試過講英文避開佢耳目, 不過佢識多咗好多生字, 依家唯有將嗰樣野串出來, 例如:電視(TV)要避, 唯有串television, ball, toyrus……..都要串出來, 佢有時聽到望住我哋笑, 唔知佢幾時聽得明呢?
1月2日, 我哋同太嫲食飯, 天諾成晚都話要表演跳舞仲唱埋tim, 氹到個個都開心呀!!