中耳炎又來喇~

高燒到39/40度, 睇咗醫生係中耳炎媽媽仲以為豬流感, 燒足3日連食退燒藥都唔退燒攪到要塞肛先退到37度幾, 可憐嘅天諾呢兩日都請病假, 陳老師打電話來問候佢時, 媽媽第一次聽到佢用普通話同陳老師對答, 雖然只講咗”知道”,”好, 好”, 但好似好明白老師講咩咁, 好叻呀!!
哥哥病到wingwing哋, 妹妹就响屋企好活躍, 爬來爬去之餘依家唔扶野可以行到幾步tim~~
今晚好番好多, 媽媽同佢唱返d普通話歌, 佢都好enjoy呀!!又扮miss Abby讀書, 爸爸媽媽妹妹要坐定定做同學仔, 妹妹爬走咗就問where are the children? 爸爸媽媽用廣東話傾計, 佢又話speak English please~~~ 最後讀咗兩本書就落堂話you can play the toys. 嘩!原來佢進步咗咁多, 好叻呀! 聽日可以返學喇~~ 佢話好掛住Chloe wow(坐隔離嘅同學仔)

我自己著褲

快秋涼, 媽媽為妹妹準備咗d保暖衣物,粉紅.白.藍 幾條襪褲仔可以襯裙, 天諾見到有藍色以為係買俾佢, 即刻試著, 又俾佢塞得落wow, 睇吓幾slim, 佢仲話今日陳老師教佢哋自己著褲!
臨瞓前佢同媽媽講miss Abby同佢哋玩sounds and letters, 好好玩仲要一個一個坐chair排隊玩嫁!!

P.S.今晚百厭妹妹响梳化爬差d頭落地先, 好彩爸爸太極上身, 半空抱返起佢喳!!

SC Parents Briefing day

今日天諾學校briefing, 只有1位家長可以出席, 今次係天諾送媽媽返學, 天諾話好想同媽媽一齊返(仲話我好鍾意返學架), 然後媽媽落車佢仲喊出來, 爸爸氹佢話帶佢去玩具反斗城, 天諾即刻食住上喊住話”我要買大盒玩具”, oh!!睇來爸爸中招喇 =p=

夜晚陪天諾溫習學琴嘅功課, 原來天諾俾心機起上來, 寫字可以好靚, 不過佢耐性真係欠奉, 寫幾隻字後就唔用心lu~~講起學琴天諾向媽媽表示唔想學, 其實媽媽會隨佢意願唔學, 但又唔想佢以為D野可以咁容易放棄, 又要同佢講吓道理先!!
同妹妹玩two three up, 佢識低頭玩好攪笑!

送細佬返學

今朝天諾7點半就起咗身, 咁早帶佢去送天行返學, 如果唔係佢一定會成朝睇電視, 天諾見番d舊同學好雀躍, 周圍聊人玩同影相, 天行好乖有哥哥送返學, 响屋企樓下見到哥哥已好開心, 上車仲冇喊tim…..好叻呀!
夜晚我哋同爺爺嫲嫲食飯(旅行前夕呀), 玩得開心d, 一個月後見!!

Baby Einstein

唔知點解天諾依家超晒齡先鍾意睇, 而妹妹睇親都拍手!! 其實大人睇完覺得好無聊吓, 自己屋企都製作到嫁 >p<

巨爵

呢個風球攪到天諾停課兩日, 尋日爺爺嫲嫲幫忙帶天諾去睇 醫生, 醫生話佢氣管有病毒感染, 要吸一支有消炎成份嘅噴霧, 五日療程希望佢快d好啦, 尋晚雖然8號風球,照原定同嫲嫲預早食生日飯, 妹妹有街去就最開心, 今朝落咗8號同天諾去買餸, 佢初初痴住電視唔肯去, 媽媽叫佢幫手拖住買餸車佢先貪得意一齊去!

天諾氣管敏感

今日嘅天氣+空氣實在太差, 天諾嘅氣管好敏感出現氣促嘅情況, 好彩屋企有氣管藥俾佢吸吓, 頂住先, 聽日去睇醫生!

天穎9個月喇~

9個月大成日發牙痕, 同我哋食飯飲茶睇住我哋食又會大叫表示想食埋一份, 依家頭髮長少少似返d囡囡喇~~ 妹妹可能好快識行, 成日要人扶佢响屋企行來行去, 仲可以唔駛扶野企幾秒!

今晚一家去咗同太嫲食生日飯, 天穎有壽飽食不知幾開心, 天行就cunning face氹大家, 天諾梗係主持生日歌環節啦!! 不過影相天諾最唔合作呀!

打風返學會扭計?

呢個星期開始正常返學時間,其實都係3hours, 星期初表現好ok, 尋日仲好地地遞紙巾俾喊緊嘅同學仔, 今日突然扭計返學有幾滴眼淚,佢話好擔心屋企d衫會被風吹走喎!!
見佢咁扭計就打電話去學校同老師傾吓先, 老師話佢响學校好好, 一般普通話嘅指令都聽得明, 同同學仔又有交流~~hehe其實媽媽打電話去學校仲有另一目的, 事原天諾向媽媽反映好幾次在學校playground時間冇得玩車仔好唔開心 (因為其他人有得玩而佢冇), 所以請老師安排吓等佢返學有番興趣, 今晚無啦啦話要做d手工送俾老師, 唔知同有車仔玩有冇關係呢?

Tea time with羊b

好耐冇見羊b喇~ 天諾一見到就話個bb好得意wor~~羊b見到我哋第一時間手指指, 天穎都唔執輸, 同羊b排排坐時聊佢傾計, 最後仲出手tim, 唔知係咪熱情得滯, 羊b即喊, 哈哈!好攪笑呀!!!

終於好清楚影到天穎嘅牙仔喇~~

上學去第五日

今日繼續大哥哥典範好照顧同學仔叫同學仔唔好喊, 呢個星期佢表現好好!! 下星期要交校服相, 今晚就幫佢影咗 ~~
先來一張, 開始影喇, 佢就俾咗個古靈精怪嘅表情……

正經d 啦!! 點知個樣得, 仲好cute但又坐到斜晒~~

再來~~坐好d啦!! 就來一個木口木面

爸爸媽媽開始有d勞氣!! Tim Tim笑吓啦!! 一笑就……

最後搵到一張似樣d去交貨

上學去第四日

今日開始婆婆幫手湊返學, 婆婆話天諾好乖, 上車時有同學仔喊天諾就主動安慰話”唔駛喊架, 返學有好多野玩, 又有茶點, 食完野痾埋veevee就放學架喇!” 哈哈!!咁似媽媽同佢講過嘅^p^

返到屋企媽媽問佢今日學校有咩玩, 佢話今日陳老師帶佢去學校花園玩, Miss Abby睇住佢哋玩同埋唱 London Bridge is falling down, 食茶點時Chloe食魚仔餅,佢有用自己嘅蛋糕仔交換食, 再問佢開唔開心呀? 佢話開心開心!!

上學去第三日

完全冇想喊, 仲好照顧同學仔, 返學好開心咁落車, 仲識得報告俾同學仔嘅爸爸媽媽聽”妹妹今日返學果時有少少喊, 放學冇喊喇” 氹到人哋獎佢食餅餅…….之後問天諾返學開唔開心, 答案仍係開心, 真係好喇~~

上學去第二日

今日都係有媽媽陪, 天諾表現得好大哥哥, 我同佢講聽日就要自己返學, 記住要做個叻叻豬呀! 天諾好有自信咁回應仲同一齊上校巴嘅同學仔父母講”我幫你睇住個妹妹啦!”

未來一年天諾就按呢個時間表上堂呀!