公園玩

百厭天穎痴住哥哥去公園玩, 爬來爬去又sir滑梯又玩吊環, 真係活躍過14個月嘅天諾呀!

0601- 4歲生日會

好耐冇見响bk識嘅06年1月bb喇~~由手抱bb嘅gathering到依家自己識玩遊戲, 時間過得真快, 今年妹妹第一次參加都各自各精彩…..

妹妹望住人眼甘甘唔知諗咩

天諾排排企玩遊戲
扮青蛙
天諾拖天穎玩遊戲

做功課

平時天諾做功課可以用馬虎來形容, 今日突然提議响幅圖度加d野, 即俾佢自由發揮吓, 呢個作品經佢解說一番後, 都有幾分似wor!!之後再同媽媽用成個鐘製作好多caterpillar佈置張床.

Regular phonics class

今日開始天諾每個星期四朝早要上phonics課, 同堂仲有可愛嘅Chloe and Anson, 起初擔心返學前安排節目會令佢好攰, 好彩嫲嫲觀察話佢好enjoy, 有同學仔效應食飯特別乖同快呀!! 今晚仲主動唱uncle bill教嘅phonics song, 雖然首歌唱得未完整, 起碼知道佢係吸收緊啦!
次次哥哥唱歌妹妹都反應好好架, 你哋睇吓佢beautiful eyes幾攪笑!!

p.s 今晚開始爸爸每個星期四晚都要OT, 天諾有d唔慣, 成日叫住等埋爸爸返屋企先瞓呢~~

天諾婆婆舊歷生日

今晚係天諾同婆婆舊歷生日, 其實早一晚天諾已問定駛唔駛返學, 媽媽話要呀! 天諾就答:但係婆婆生日喎!!哈哈 佢以為生日大晒架!

婆婆記性都唔錯, 提起天諾出生嗰日, 原本嘅大餐變咗大排檔:p 食飯前由天諾同表表獻花, 生日嘅表演係天諾同表表唱歌, 天穎同細表跳舞,飯後都係由佢哋唱歌及吹candle, 哎呀!天諾同表表最後頭撞頭呢!不過好快冇事, 蛋糕照食~~

新聞分享

天諾學校為加強小朋友對社會時事關注舉辦了新聞分享活動, 明天就輪到天諾分享, 媽媽今晚就用有限嘅普通話同佢practice吓!

百厭妹妹

天穎真係大膽過哥哥, 咩都跟哥哥玩, 連單車都同哥哥爭玩呀!!

天諾手指畫

今日帶天諾返science workshop見到佢classroom門口換咗相, 天諾自己見到都好興奮呀! 梗係要影低俾大家睇吓啦~~

以前天諾做勞作好怕污穢, 隻手仔touch到少少顏料就嘈到c…..今日又mister maker上身, 竟然主動提出用手來畫畫, 好叻叻呀!!

食蘋果

天諾成日話自己大個仔, 連食蘋果都唔駛媽媽切粒粒, 睇吓佢食得幾enjoy!
希望真係每日一蘋果醫生遠離我啦!

天諾入院

星期一, 二, 本來爸爸媽媽一早請定假帶兩個b去攞證件, 點知天諾星期一有d氣促, 唉~~唯有爸爸帶佢睇吓醫生先, 同平時一樣响醫院要聞氣, 不過聞完氣佢嘅血氧未有改善所以醫生建議入院, 就係咁住咗3日兩夜, 其實天諾全程好精神, 成日走去聊其他病床嘅小朋友 每朝起身都話要返屋企…星期三終於返到屋企喇, 幾日冇見妹妹……兩兄妹一見面攬到實!! 大家一齊睇電視, 玩車車…..見到佢哋感情咁好, 真係特別開心呀~~

胃食妹妹

為咗食野要求妹妹叫咩都肯, 好攪笑呀!! 仲發現佢叫ling ling=公公呀

學校生活

話說今日與天諾同學仔媽咪msn, 得知天諾响學校嘅曵事-排隊碰撞之下被老師罰排最尾……唉~天諾好性經常爭排第一已經唔係第一次, 今次真係要好好詳細教導下喇~~不過未問天諾之前, 先打電話向老師了解吓, 陳老師話天諾一向表現都沒有問題, 不過呢個星期三開始與同學一齊玩的身體接觸多咗仲有爭嘅情況出現…今日與同學玩電腦時大家出手tim, 雖然老師見狀即上前叫停, 但天諾臉上已被同學抓傷咗……..媽媽心想可能由星期二晚開始天諾搬床後睡眠不足引致脾氣差d…….anyway唔好幫佢搵藉口, 要同佢傾多d計教吓佢先得!!

另外老師觀察到一樣有趣事, 呢個星期嘅topic係家居安全, 而星期四同五就故事形式教小朋友如果有陌生人按門鐘應該點做, 老師話天諾連續兩日都响講呢個故事時用手蓋住耳同埋頭仔拎開唔多願聽模樣, 老師問天諾係咪有咩不愉快經歷? 真考起何解佢會咁呢?

搬房:第四夜

今晚媽媽約咗十幾年冇見嘅中學同學聚會, 原本天諾答應一齊出席, 不過放學先同嫲嫲帶佢去玩具反斗城揀禮物獎勵搬床自己瞓咁叻叻, 今日終於批准佢買心思思咗兩個月嘅大畫板……咁開心所以想即刻返屋企玩而唔陪媽媽去街街~~唯有爸爸帶佢返屋企玩啦!!
爸爸話佢好乖, 自己上床瞓, 未到10點就瞓著, 呢晚可能真係好攰一覺過10點瞓到朝早8點, good boy 呀!!

搬房:第三試夜

今晚同尋晚嘅瞓覺過程差不多, 一刷完牙去瞓覺就識去自己張床~~9:45pm上床, 同樣又話痾v v又話痾poopoo, 媽媽坐床尾睇住佢自己瞓, 最後10:15pm瞓著, 今晚媽媽俾多個任務佢, 就係唔好半夜飲奶, 佢一口答應……. 好乖呢!!
後記: 天諾呢晚真係冇飲奶, 不過就零晨3點咳醒, 佢冇搵媽媽陪, 不過見佢咳得咁辛苦, 媽媽都陪到佢唔咳瞓林咗先瞓, 其實佢真係好叻, 希望佢今晚瞓得好d啦~~

天諾呢個星期好乖, 知道媽媽執緊屋企叫佢d生日禮物放响爸爸車度佢都願意, 只要求每日拎一份返屋企, 今日就玩咗zita送嘅禮物, 又好似maker上身咁!

搬房:第二夜

今晚好明顯天諾想同爸爸媽媽瞓, 不過媽媽只用5分鐘左右就說服咗佢呀~~理由係….(佢咁鍾意同學仔,用佢哋來作例子就最好不過) 首先媽媽提起”Chloe都係自己瞓, chloe有沾沾(公仔)陪, 而你就有小白兔同妹妹陪, 你仲大個仔d啦4歲wor! 你一定做得到既…..Issac未到4歲, 不過男仔都可以自己瞓咁叻仔架!!” 之後天諾就嘟咀點頭接受!! 見佢接受咗再加d咀頭先….”嗱!大個仔先可以自己瞓上格床架, 天行同大表表都太細冇得瞓, 得你有呀, 係咪?” 天諾就話”係!”跟住就開始準備瞓喇~~9:45pm下上床, 同尋晚一樣又話痾v v又話痾poopoo, 攪到10點連妹妹都要瞓, 唯有叫佢自己瞓, 媽媽响下格床餵妹妹奶奶…….結果妹妹飲一支奶時間天諾就瞓著咗, 好乖呢!!
臨瞓前兩個貪得意做咗衣櫃裡的小孩

後記: 天諾都係零晨5點扎醒, 不過佢好叻, 冇喊住搵媽媽陪, 只係細細聲叫醒auntie要飲奶奶, 佢怕嘈醒妹妹呀, 真乖啊~~天氣咁凍都係唔忍心, 雖然佢冇叫媽媽陪, 但都去睇吓佢夠唔夠暖, 天諾見到媽媽特別開心, 所以媽媽都陪佢直到再瞓番為止….今次叻叻呀, 好快瞓番,只需半個鐘媽媽就可以返房瞓lu!!

天諾搬房:第一試驗夜!!

講起上來好似好普通, 但天諾自出生以來未試過同爸爸媽媽分房瞓, 今日足4歲係一個值得記念嘅日子呀!
第一次上到自己張新床相當興奮, 9點幾上床忙住用貼紙佈置, 再揀d喜歡嘅書放上床尾書架, 10點鐘熄燈瞓, 仲趕爸爸出房話唔駛人陪, 點知隔一陣就話要痾v v, 再返上床碌過, 唔夠10分鐘又話痾v v, 再10分鐘後仲要痾poopoo!! 似乎開始動搖想返爸爸媽媽房, 連爸爸都心軟問佢去返爸爸房好唔好, 媽媽即刻阻止再加以鼓勵佢大個仔瞓新床仔, 為免佢又去洗手間媽媽陪佢直至瞓著為止, 10:35終於瞓著喇~~~雖然其間天諾講過媽媽張床舒服d想返去瞓, 但最終俾媽媽說服咗, 都算成功啦!!

後記: 零晨5點天諾扎醒搵媽媽, 要媽媽陪, 氹吓瞓返又醒, 攪咗兩個鐘到7點媽媽可以返房瞓lu……好明白佢未咁快適應到, 希望佢快d習慣啦~~今晚再同佢搏鬥過!!

新床送到~~

天諾越大爸爸媽媽瞓嘅空間就越少, 趁住快到4歲係時候俾佢一個改變, 為佢同妹妹訂做咗張子母床, 讓佢學懂獨立--自己瞓~~今日新床送來, 冇時間煮飯所以出街食, 妹妹好難得正正經經同叔叔嬸嬸合照呢! 食完飯返到屋企天諾見到張新床好興奮話要同妹妹同房瞓, 不過還要執拾一番先可以俾佢瞓~~挑戰!!聽日就來喇!!

妹妹啜烏冬

我哋開飯天穎成日都痴住爸爸食白飯, 雖然食咗粥仔, 但都可以食到1/3-半碗白飯! 有時煮烏冬做早餐, 佢又唔執輸食埋一份, 本來剪碎俾佢食, 食食吓爸爸發現佢識啜烏冬, 好得意呀!!

公公婆婆六十大壽

天諾生日會接住嘅節目就係公公婆婆擺六十大壽喇~~我哋冇大攪只係一家人食飯但都好開心, 而賀禮同回禮就跟傳統, 先有八仙賀壽…哈哈!!送出來時連公公婆婆都感意外同開心~~回禮呢婆婆準備咗一人一個金壽桃…..一齊戴住來影相好有意義呀!!
可惜天諾影相唔多合作, 可能佢响生日會影得太多相所以有d唔耐煩, 反而大細表雖然有d唔舒服, 但表現幾好喎!! D靚相响姨姨度未拎tim, 睇住呢d先啦!

天諾4歲生日會@ McDonald

天諾等到頸都長, 呢個星期每日問住”聽日開生日會未呀!”今日終於到喇~~
天諾好開心同興奮, 多謝各位朋友仔+同學仔參加同埋禮物呀! 今日天諾嘅表現好好, 食野同玩遊戲都可以自己攪掂,玩遊戲時仲與同學仔一齊唱學校教嘅歌, 爸爸媽媽覺得佢好大個仔,不過有d失禮, 因為天諾收咗禮物要睇吓先再招呼人:p 呢點要慢慢教, 依家就當係佢嘅童真啦~~同以往一樣, 蛋糕一出場, 天諾雙眼極度唔願意離開蛋糕, 影大合照就係佢偷食時間呢~~蛋糕切好時, 天諾自己坐埋一邊密密食, 完全唔理其他人玩得幾咁高興…… 天穎呢就有d怕醜, stick住媽媽唔肯俾人抱!

型仔來喇~~

呢個星期為生日會籌備, conifrm會場, 訂蛋榚, 買回禮禮物, 樣樣都叫埋天諾去親力親為, 今日就帶佢剪個型仔髮型, 其實聖誕前夕, 媽媽見天諾d頭髮長到眼同耳, 幫佢剪咗幾刀 :p, 連Bonnie姨姨都話好難修復吓, 不過最後都剪到個型仔頭, 真係唔該晒!!

Mister maker

自從聖誕時爸爸媽媽送咗nowTV447台俾天諾做聖誕禮物, 天諾就愛上睇Mister maker, 依家日日响屋企攪創作, 佢d作品要聰明人先睇得明架! 而妹妹就鍾意得得B, 依家成日講ooh oh!!!
呢份就係天諾的第一份創作喇~~

行山樂@城門水塘

第一次同天諾天行天穎行山, 行山野餐仲見埋馬騮都不知幾開心!! 哥哥一邊行一邊玩車, 天行就同哥哥比賽, 妹妹就不論泥路, 石路, 草地….咩都照行~~天諾天穎有一共同點就係鍾意食喇~~

科學園

今日同爺爺嫲嫲去科學園行吓,雖然陰天仲有少少雨, 但唔熱又唔大風都幾舒服~天諾响個石駁上玩咗車仔運石頭成粒鐘呀, 天穎又係周圍行攪攪陣……. 兩個唔肯合作影相, 激死人喇!!
臨走响金蛋前影吓相, 拍完video先知個草地唔入得, so sorry!!

Happy New Year

2010年第一日, 一家同姨媽姨丈去咗數碼港 參加嘉年華會, 好多野啱天諾玩呀!
天諾最愛揸碰碰船…

之後再玩滑梯, 睇落去有d高,以為天諾handle到, 點知天諾sir完一次驚驚唔想玩, 經我哋鼓勵之下玩多次試試克服吓, 都算叻叻啦!!可惜video 太長upload唔到tim~~
天穎周圍行已經夠晒開心, 最鍾意搭電梯(有d危險架!!)