妹妹快兩歲喇~~

爺爺嫲嫲要去十幾日旅行, 所以今晚預先同天穎慶祝兩歲生日!多謝各位賞面!! 大日子當然又係妹妹扮靚嘅時候啦~~有得著裙仔, 妹妹超開心,不過仍然好冇儀態, 著咗裙都唔似女仔, 成餐飯周圍滕…..唉……..天諾天行天穎最開心就係玩扮坐火車!! 最攪笑係唱完生日歌, 天穎唔駛教已識第一時間吹熄candle,連哥哥都唔夠佢快呀, 哈哈!!一家人一齊食飯最開心, 今晚影到幾張大合照都唔錯,yeah!!!

Birthday party@ AMC Adventure Zone

第一次參加天諾lower班同學仔party, 個場一去到天諾開心到野都唔食只顧住玩, 妹妹一路跟住哥哥, 爸爸跟住妹妹爬高琴低, 媽媽就忙於同同學仔媽咪交流一番, 各有各忙嘅生日會呢! 當天與天諾N班同學仔Chloe Wong相遇, oh~兩個久別重逢, 拖住手一齊玩好似小情侶一樣!
講番個party,話明adventure zone,遊戲梗係會刺激d啦, 其中一個slide幾米高, 妹妹見到即沖上樓梯叫住”玩”, 爸爸媽媽都覺得有離心力架, 但大膽妹妹居然玩完一次又一次, 哥哥呢見妹妹玩得咁過癮, 先試玩一次, 跟住就話玩過唔玩喇~呵呵, 哥哥嚇驚唔敢再玩lu!!
今日媽媽最大得著係同其他媽咪傾計, 知道原來天諾班主任真係好嚴, 仲經常有negative comment俾家長, 聽完媽媽真係鬆一口氣呀!! 因為平時同老師傾完電 話總會好down,以為佢真係好唔掂……不過都唔可以太鬆懈呀, 明年就要考小學喇~~

Tia playgroup 旅行+ 德望interview + 清明上河圖

今日Tia playgroup去咗歌和老街公園旅行, 雖然佢果班只有兩個同學仔去, 但一去到Miss Karen就撩佢一齊玩,自由活動時間Tia就最開心,周圍走,見到其他kids玩bubbles,Tia好唔客氣玩埋一份, 又跑又跳, 連隔離班老師見到都話呢個妹妹行得好穩陣!! Miss Karen仲話Tia is a good runner…….. 哈哈!

完咗個trip後,嗱嗱林送佢返屋企休息, 準備下午德望interview!
一條龍嘅學校好多家長都好鐘意, 不過估唔到淨係囡都有咁多人!! 成個流程由入校門到出番來用咗45分鐘, 但其實真正interview咗10-15分鐘, 主要係一group6個小朋友(有一個家長陪, 另一家長考筆試填問卷),天穎唔肯講自己叫咩名但全程都算合作(可能小朋友只係自己玩玩具唔駛交流), in完出來爸爸媽媽都唔知個收生準則, 希望遲吓有好消息啦~~

今日行程仲未完架,送咗阿囡返屋企,就接哥哥去睇清明上河圖!!山長水遠去見識吓湊吓熱鬧啦~~ 初初天諾話唔好睇, 但當佢見到個紅衫公仔走出來, 就好開心仲睇咗4次同一動作!
之後去咗食壽司,天諾堅持要等到迴轉位……唉!難為了爺爺嫲嫲陪等位呢,等咗成個鐘架,食得飽飽咁走, 好滿足好充實的一天 !

寫聖誕卡

前日天諾响學校收到第一張聖誕卡,返到屋企後就話自己都要準備俾其他同學! 好彩姨媽一早就 送咗一大疊卡俾天諾,yeah!!即晚開工, 每晚用半小時坐定定寫, oh!好難得佢咁樂意寫字呢!已經連續第三晚喇~~完成咗12張卡, 今日寫咗最難寫既 “蔡老師”, 希望12月中前寫晒俾成班同學啦~~

爸爸OT

爸爸唔返來食飯既日子, 兩個B係會乖d架! 爸爸成日問”咁係咪叫佢唔好返來食飯!”…………當然唔係啦~~今晚臨瞓前, 兩個玩到癲晒,好friend又唔打交, 叫佢哋影相又好合作, 不過一叫妹妹笑住影相, 佢對眼就蒙到好細!!

失而復得嘅video

媽媽個電話壞咗, 以為d相同video冇晒, 好彩可以restore番, 唔該姨媽滕來滕去fix個電話………..
呢個video兩表兄妹同表弟玩好攪笑架!

兩個八掛小幫手

唔該公公今晚專登來幫我哋維修, 兩個八掛小幫手梗係只負責氹公公啦~~天諾就每事問, 天穎就成日想動手!!

珊姑姐big day

恭喜姑姐姑丈! 祝新婚快樂,快d生個b陪天諾天穎玩,哈哈!!
Yeah…今日又有機會同佢兩兄妹扮靚喇~~中午先到黃金海岸觀禮, 原本安排佢兩個當花仔花女, 但臨場rundown miss咗, 好彩我哋影咗好多相, 補番晒!! 禮成影大合照時, 天諾天穎超合作企第一排影相(爸爸媽媽响第三排), 不過要睇番offical嘅相先確認到佢哋嘅表現!

眠一眠過後, 天穎勁開心換裙仔去街, 天諾亦襯一襯妹妹呀!!佢兩個今晚幫手拋花花陪一對新人march in, 天諾就覺得好興奮因為佢從未試過呢, 可惜相同video都睇唔清呀, 珊姑姐靠你俾相我哋喇! 例牌晚宴時間d細佬會上台跳吓, 勁開心呢!!

兄妹裝

顏色鮮艷嘅兄妹裝, 媽媽勁like呀, 特別係貼貼哋身~~好型呢!!

玩水彩

妹妹又要玩埋一份, 哥哥話要畫Auntie果d黑面人喎! wakakakaka~~~~

貪靚

女仔真係天生貪靚?
今日俾天穎試吓裙仔, 一試之下唔捨得除呀!!

捉迷藏-天穎version

不能不讚天穎記性好, 哥哥每次朗誦的誦詞佢都背到~~當然發音有待改善啦!!
誦詞: 你做小狗我做貓, 我去藏了你來找, 小狗找貓找不到, 急得汪汪叫, 貓對小狗輕輕叫, 喵喵喵, 找到了找到了,小狗小貓哈哈笑!

House warming @ Chloe’s home

其待咗兩日嘅節目終於到喇~~今日天諾起身開眼第一句說話係問幾時去chloe度呀!! Hehe同學仔一齊玩係最開心嘅, 天諾仲好喜歡penthouse 設計, 返到屋企周圍搵地方開樓梯呢~~當媽媽解釋完後,知道屋企唔會有樓梯通往第二層, 佢就同媽媽講下次買間有兩層嘅屋啦~~哈哈談何容易~~~媽媽即時食住上要天諾幫手一齊儲錢, 將每星期買玩具嘅錢儲起買大屋用, 佢又好似好明, 唉~~佢成日3分鐘熱度, 今次唔知可堅持幾耐唔買玩具呢?

Tia first K1 interview

今日真係出師不利, 先來落雨响學校外邊排隊, 好狠狽呢! 入到學校再要等, 等咗差不多1粒鐘, 媽媽俾天穎嘅乾糧已食晒, 天穎亦開始唔耐煩…………
首先到達玩具室, 4位小朋友被安排一齊玩lego, 開始時已有兩位小朋友喊, 好彩天穎冇受影響,要砌高lego對天穎來講係easy job,問題係佢對此興趣不大, 砌完一次佢已經離開座位周圍搵野玩, 最後仲去隔離枱拎thomas車仔玩呀, 媽媽叫佢坐定定佢反抗又叫起上來, 老師見狀叫媽媽唔好刺激佢怕影響下一輪表現……..不過媽媽已經心知不妙!!
到見老師對答, 老師問佢叫咩名佢答得好快, 不過答完一題天穎已經起身想離開課室, 老師再問佢係男仔定女仔係邊個帶佢來, 佢已經唔想再答, 老師就用其他道具引佢, 做一些顏色matching天穎都做到, 再俾一幅圖佢睇, 天穎就拒絕叫唔好……….唉~成個interview過程周圍郁應該係死穴呀!!! 仲扭計要老師坐位後面嘅餅餅! 最後老師都怕咗佢俾餅佢先…………到媽媽答問題時間天穎又扭計要走又開始想喊…………. 媽媽想無晒心機答老師lu……..
最後見普通話老師係表現最好的一part,可能因為老師知佢肚餓俾佢食住餅答, 所以佢肯跟老師講早, 貓,狗, 同做matching….仲好開心跟老師說再見呀!! 雖然最後一關好順利, 但總括今日嘅表現應該成功機會好微!! 希望餘下interview會好d啦~~~

學校趣錄

呢個星期天諾响睡前同媽媽傾計講咗好多學校嘅事, 好開心知多d佢學校嘅野呀!
1. 呢個星期全班同學調位, 天諾被安排坐red table group, 媽媽問其他同學Zita,Jeff,Anson,Tiffany…位置時佢都好快回答, 當問到Ambrose呢, 天諾答: 老師話我 哋唔可以一齊坐呀! 媽媽問:點解呀? 天諾話:我哋成日傾計lor! 媽媽問:吓!咁你依家有冇同隔離位傾計呀? 天諾:一時時啦!! ………睇來佢响學校唔係乖學生呢~~
2. 天諾話今日xx同學個爸爸來學校介紹佢做咩(職業); 媽媽問:咁佢做咩架, 講得好唔好聽? 天諾話:好好聽呀, 佢揸飛機係飛機師(用普通話講)! 媽媽:嘩! 揸飛機好似好好玩喎, 你第日想唔想做呀? 天諾:唔想, 我想做劉醫生!! 媽媽當然支持同多加鼓勵叫佢要努力啦~~

天穎愛讀書

呢兩個月開始, 天諾10點前定必睡著, 而媽媽同天穎嘅親子時間就開始, 天穎响每晚臨瞓前都會睇吓書, 但所有書都係自己揀, 佢亦認定只有媽媽或auntie同佢讀書, 如果爸爸入房聽佢讀書, 佢會趕爸爸出房架, 唔覺唔覺天穎已識認好多圖, 今晚錄咗, 唔知大家聽得明幾多呢?