冬季校服

今日天諾第一次响SC生日會,佢好心急返學連平時鍾意嘅卡通片都唔睇, 比平時早咗好多出門口,媽媽專登請半日假約埋天諾同學仔嘅媽媽接放學去買冬季校服,先來4個媽媽LUNCH一聚交換小朋友返學情況,好好傾呀~話咁快就夠鐘接放學!! 今日留响課室同老師傾吓計, 睇吓佢平時上課表現如何…..天諾就响課室同同學仔(issac, zita, chloe, po chun)周圍跑周圍叫又成日攬住Chloe, 兩個班主任都異口同聲話佢哋係好朋友, 叫佢影相佢就係古靈精怪~~

先同普通話陳老師傾傾…..
媽媽: 天諾响學校表現如何?
陳老師: 天諾在學校很好很健談, 不過與同學說廣東話比較多…
媽媽:天諾在家已經跟我多說一點普通話了
陳老師: 其實我鼓勵他, 他也說多一點, 連同學們都一起鼓勵他說..
媽媽: 食茶點又如何呢
陳老師: 基本上他很喜歡食茶點, 有時問佢請食藍莓, 他不分享, 哈哈!!有幾位小朋友食得好快, 他是其中一位, 他好快食完就自己收拾用具…

到見到miss Abby,
天諾: She is my mother (天諾突然走過來指住媽媽講)
Miss Abby: Oh! Very good introduction! (連媽媽都好驚訝佢主動介紹)
媽媽: Hello Miss Abby! How’s Tim at school?
Miss Abby: We talk a lot and he is willing to speak English. But sometimes he speaks very loud even we are at close distant.
媽媽: oh~we encourage him to speak quietly at home too. How about the artwork? I found he did not follow your instruction when doing the artwork.
Miss Abby: He can understand my instruction and he complete the artwork very fast. Every time he fill in the color on the sheet, he do it rush.
媽媽: oh! He’s lack of patient to do that.
Miss Abby: Don’t worry, he’s still small, we just let him try first.
跟住媽媽見到課室壁佈版上見到有天諾嘅相, Miss Abby叫咗天諾介紹俾媽媽聽, 佢哋一問一答, 天諾好enjoy咁!
經過同兩位老師談話, 我feel到天諾响學校應該係好開心, 而評語方面粗俗d講句, 天諾係口水佬同大聲公…..haha~~~

放學後與同學仔一齊去買冬季校服, 响的士途中, 三個小朋友一齊唱普通話兒歌, 嘈得來又好開心喎, 天話仲好攪笑作歌詞tim….. http://www.youtube.com/watch?v=Yd8n0dijUVU

p.s.妹妹流鼻水仲未好番, 今晚仲有少少燒, 咁耐以來第一次發燒呀, 所以好緊張即刻抱佢去睇醫生, 夜晚餵佢食藥唔like仲連奶奶都嘔晒出來(天諾見到妹妹嘔自己都有個作嘔樣), 最後d藥要撈落奶奶度先飲晒呀!! 天穎第一次要食藥, 希望佢快d好番啦!!

我唔食糖喇~

今日學校派咗本刷牙及飲食記錄簿, 鼓勵小朋友早晚刷牙同埋乖乖食正餐唔要食零食, 天諾似乎好緊張媽媽唔俾個tick响記錄度, 食飯淨番兩啖媽媽一話冇tick佢即刻食埋佢, 一晚同媽媽講咗兩次"我唔食糖喇~", 臨瞓前又好乖叫媽媽陪佢刷牙亦提醒媽媽企响佢後面幫佢補刷.......究竟學校同佢講咗d咩呢?今晚咁乖既!! 如果日日都咁乖就好lu!!

哎呀!!妹妹今晚有d鼻水, 之前試過兩次都可以瞓一晚自己好番, 希望今次都一樣啦, 天穎加油呀!!

媽媽"我愛你"

今日返到屋企, 天諾同媽媽講要帶醫生玩具返學又話白色玩具都得, 仲好興奮咁同婆婆講有生日會, 叫婆婆買提子俾佢帶返學tim......睇來佢响學校真係有留心聽老師講野wow....
佢仲用普通話同媽媽講"我愛你"........轉個頭又用番廣東話講媽媽我好鍾意你架!! hehe天諾似乎講之餘係明白嘅, 見到佢依家咁開心返學, 真係安樂晒~~

拜山樂

天穎第一次跟大隊去拜山, 唔知係咪人太多佢有d怯, 落去亭度玩又OK喎! 天諾至醒, 自己帶chair坐定定等食燒肉, 今次d煙特別多, 兩個b都被煙薰到眼水標晒出來啊!!

爺爺嫲嫲返來喇~~

一見面大大盒禮物, 天諾天行好開心呀, 妹妹就有d眼瞓個樣好迷茫呢! 收完禮物睇吓爺爺嫲嫲坐咩船返來先~~

Science workshop@SC + 造型照

一連十堂Science workshop嘅science and math topic開始喇, 第一堂已經教Life Cycle of Egg咁深!!天諾吸收到幾多呢?

黃昏帶咗兩個B去studio影相, 預約咗成個月架, 妹妹4個造型哥哥5個造型, 天諾影相全程好好奇同投入, 所有場景俾佢玩到盡, 攪攪震又challenge人哋嘅佈置同道具, 天穎就好似驚咗個攝影師咁, 一放低就喊, 去到媽媽最鍾意嘅天使造型, 對眼已又紅又腫, 要下次再去補影返, 媽媽偷拍咗一張(妹妹真係好得意呀), 希望佢下次合作d啦~~

影完相已經成8點lu, 再搵姨媽姨丈醫肚!

照顧魚魚

今日食lunch行過金魚街, 買咗袋魚仔俾TimTim, 第一次响屋企養魚睇吓佢會唔會好好照顧魚魚先~~

妹妹上門牙出來喇~~

雖然只係啱啱露出來, 依家成日將下排門牙磨上排來玩呀!

今晚天諾唱嘅新普通話歌-媽媽給我新衣裳…..應該未完整架, 你哋聽得明幾多呢?

我要給印仔呀!!

話說上星期天諾做功課時同爸爸講要用顏色筆做, 經歷過之前對佢嘅唔信任而內疚, 今次毫不猶疑咁俾佢自由發揮, 點知今次派番份功課見 上次嘅功課老師冇俾印仔(之前兩次有兩個印架!), 同埋老師寫咗張紙仔叫用鉛筆做, 天諾好唔開心, 喊住叫媽媽打電話叫老師俾番個印佢, 又要講好耐”下次做得更好老師就俾印仔”先收聲唔喊!!估唔到老師嘅印仔對佢打擊咁大……..唉! 真係唔知邊次信佢先啱lu!!!

今日收到學校便條話天諾果班有個同學仔有手足口病, 因為易傳染, 所以叫家長多加留意小朋友~~好擔心呢~~希望天諾冇事啦!!

Hei Hei 生日會

妹妹今日著靚靚新衫去飲茶, 之後响公園行咗一陣, 哥哥跑來跑去, 妹妹都唔執輸要行來行去, 跟住返屋企餵妹妹食完粥仔就出發去Hei Hei生日會喇~~
只係25分鐘車程, 兩個b做咗睡寶寶, 俾佢哋响架車度瞓吓先!! 瞓著個樣都好得意呀!!(媽媽戀b狂又來! 哈哈~)

天諾每次去人哋d生日會都當自己係主人家, 今日都唔例外, 由食野, 玩遊戲, 玩玩具都自己來.... 到咗生日蛋糕出場時間, 天諾又幫人打醒12分精神睇住個蛋糕, 好彩張枱夠大天諾動唔到手, 不過當個蛋糕推埋d佢就蠢蠢欲動~~
哎呀!影到佢郁手喇~~

去到影相時間天諾拎住個咪唱歌幫手引羊b望鏡頭, 天諾拎住個咪好似上身一樣, 一連唱咗五至六次Happy Birthday, 好攪笑! Hehe又食又拎我哋玩得好開心呀~~~祝羊B快高長大, 身體健康!!

排排坐食早餐

今日天諾學校教師發展日放假一天, 唔駛返學佢反而好早起身, 7:30就同妹妹玩, 媽媽一早帶咗妹妹陪哥哥去踏單車再返屋企食早餐先返工, 妹妹拎住包包自己食好叻呀!!

畫工

放工返到屋企, 天諾同姨姨畫緊畫, 姿勢唔錯嫁, 你哋估吓佢畫咗d咩送俾媽媽~~

牛天諾

好一個普通話嘅笑話, 我哋响屋企教天諾”牛”字嘅普通話, 講完佢自己運用吓, 點知爆出一個普通話” 牛天諾”笑到公公碌地呀!! 之後我哋重複牛同劉嘅讀音分別, 唔知佢分唔分到呢?

小手工

今日媽媽個同事請食台灣手信, 好好味嘅布丁啊~ 個蛋殼咁靚, 唔好浪費, 帶咗返屋企同天諾做手工先! 天諾好鍾意呀, 俾佢自由發揮吓, 有以下作品~~

今晚佢又扮老師, 一開始就話”Today we are going to read story.”
爸爸媽媽都好驚訝佢講到咁長嘅complete sentence呀!

臨瞓前, 佢仲唱咗好多學校教嘅phonic songs, 媽媽又做咗佢學生喇~~

天穎10個月喇~

10個月21磅, 識叫爸爸,媽媽,哥哥, 婆婆(只有口型但冇聲), mum mum, bye bye
好鍾意痴住哥哥同玩躲貓貓, 識行同爬得好快, 1日4餐奶兩餐粥+水果, 最鍾意睇米奇妙妙屋, 聽到結尾音樂就即un腳fing手跳舞, 識得say no嘅指令就係狂搖頭……

今日天氣陰陰涼涼帶咗兩兄妹去 城寨公園玩, 天諾拎住媽媽送俾佢張摺chair周圍坐好攪笑, 妹妹第一次玩swing and slide都好enjoy~~

新髮型

今日終於成功帶天諾去剪頭髮, 成個過程比想像中順利呀! 天諾好乖咁聽指示俾Bonnie姐姐幫佢剪, 剪完仲狂照鏡, 又話老師實讚佢靚tim….唔該晒芬姨姨嘅安排同Bonnie姐姐啊~~
剪髮前
剪髮中
剪髮後
剪完頭髮搵埋妹妹去醫肚~~
黃昏帶咗佢同爸爸踢波, 天諾踢波一向都唔錯架, 不過同佢跑圈似乎冇以前咁好氣wor…..

阿仔sorry呀!!

話說星期二晚同天諾玩果時, 天諾同媽媽講”老師叫帶玩具返學”, 媽媽第一個反應係以為佢貪玩, 所以回應話”你自己鍾意玩玩具就响屋企玩啦, 唔帶得返學架”點知今日同天諾同學仔的媽媽msn先知原來真係老師嘅意思來架!!其實爸爸媽媽已經知道學校久唔久會叫小朋友帶野返學試吓佢哋有冇留心老師講野, 最重要係知道佢哋吸收幾多同聽得明幾多, 呢次誤解咗天諾tim, 希望冇打擊佢嘅信心啦 :p
p.s. 尋日同天諾做學校嘅連線練習, 天諾話老師叫用”鉛筆(普通話講)”來做呀, 真係考起, 好彩爸爸嘅普通話比媽媽好先識回應, 媽媽呢次要好好向天諾學習!!

媽媽生日會

媽媽生日撞啱星期日, 爸爸媽媽掙扎咗好耐究竟二人世界, 定一家四口出街食飯呢? 其實自從妹妹出世之後,爸爸媽媽未試過獨力湊兩個b出街, 所以我哋同天諾解釋要佢乖先帶埋佢去同媽媽慶祝生日, 天諾當然OK啦!~~ 好!最後都係一家四口開心d, 去到餐廳, 天諾一坐低就問”D人呢?”爸爸媽媽呆咗一陣, 咩人呀? 原來天諾以為媽媽開生日會, 會有好多人同佢玩架, hahaha~~~細佬仔心目中嘅生日就一定係一大班人慶祝架!!所以食完飯, 我哋買咗個蛋糕去搵婆婆, 姨姨, 表表一齊食….
講番餐飯, 雖然食咗兩個鐘都冇, 但係湊住兩個monsters真係好支力呀!! 不過呢個experience都好開心, 多謝各位响不同媒介 送上嘅祝福!!
今朝去飲茶, 天諾好乖話要拖住妹妹行呀!!

飲完茶, 天諾第一次玩碰碰車, 好好玩呀!!

又燒喇~~

連續兩個星期六想帶天諾去剪頭髮都去唔成, 今日中秋帶佢去睇醫生真係有d難度, 因為唔係太多診所應診, 最後搵到天諾出世時幫佢做檢查嘅醫生, 醫生話喉嚨發炎, 又要食抗生素….嗚嗚….好可憐呀!! 爸爸話好邪, 都係唔好帶佢去剪頭髮wor~~
其實瞓咗晏覺後天諾好咗好多, 所以帶佢去婆婆度玩燈籠同蠟燭, 天諾第一次玩蠟燭覺得好新鮮好好玩, 妹妹就拖住行來行去好興奮…