同表表一齊暢泳

爸爸新買嘅燈籠真有用, 未亮燈前可以帶去游水當水泡, 今次爸爸可以扶佢唔用水泡來游, 都算有進步啦~~姨姨有冇靚相俾我update呀?

太嫲生日飯

今日放學去婆婆度食碗麵補充體力, 然後爺爺嫲嫲帶佢接埋爸爸媽媽放工就出發搵壽星太嫲食晚飯, 天諾仲送咗張貼紙俾太嫲做生日禮物tim~~

曵曵事件簿

同老師再一次通電講天諾响學校嘅情況, 老師話天諾有進步, 响學校喊少咗同active咗好多, 食飯都好乖, 亦有示意去洗手間, 不過今日做咗兩件”粗魯”嘅事….媽媽聽到打個突, 咩事呢?
事件一: 午睡過後, 由於有其他同學仔未起身, 老師叫天諾留响床度休息多一陣, 點知佢走去隔離另一醒咗嘅同學仔度攞人哋隻鞋掉落垃圾桶!!!
事件二: 同學各自玩緊玩具, 有一同學想返埋位但經過天諾個位, 可能天諾以為同學仔來爭玩具, 打咗人哋心口一吓, 老師要天諾say sorry, 然後同佢講咁唔啱架, 跟住天諾就喊出來!!

事後媽媽同天諾傾計, 先讚吓佢叻叻响學校表現好好, 瞓覺同食飯好乖, 不過對同學仔要斯文d架, 問及點解掉咗人哋對鞋同打人, 佢一於唔答, 媽媽同佢解釋一輪後, 佢都肯同媽媽抅手指唔再咁做, 希望佢明啦!!

3日假期後嘅返學情況

以為假期後返學會喊住上車, 點知星期一同二都冇喊仲响校巴度同爸爸媽媽揮手byebye~~我哋心想咁叻仔安樂晒!! 點知尋日開始又喊返, 唔知係咪响學校喊完攰d, 夜晚同爺爺嫲嫲食完飯, 9點左右就瞓zzzzzz 今朝返學喊得仲犀利又拉住爸爸唔想上車, 見到有d心”up”, 希望佢快d習慣啦!

返學第三星期

呢個星期天諾已慢慢實習返全日, 响學校食埋飯,瞓覺+下午茶先返屋企, 老師話佢食飯係最快嘅一個, 不過要人餵(原來老師俾咗半碗飯佢食, 媽媽就補充佢食開一碗架!), 咁可以加份量睇吓佢係咪咁食得先. 瞓覺方面, 要老師抱住暗瞓, 都瞓到半個鐘至45分鐘度, 同埋好易俾其他同學仔嘈醒, 媽媽comment:以天諾對瞓覺環境咁高要求, 可以响學校瞓著已經好叻! 開學到依家, 天諾食飯主動咗, 會自己食飯同飲湯, 不過瞓覺唔知係咪要安全感, 同埋bb床留番俾妹妹, 呢排要瞓响爸爸媽媽中間先熟睡到, 攪到我哋瞓醒腰酸背痛, 要諗諗計引導佢去瞓番自己張大床至得!
估唔到一個月有兩次8號風球, 又有一日假期唔駛返工返學, 打完風呢個weekend去咗姨媽度燒野食仲同好多個表舅父, 表姨, 姑婆玩, 天諾第一次要求拎住支叉燒腸仔, 不過燒咗唔夠3秒就話攪掂, 笑c人喇~~

返學第二星期

天諾响呢個星期由返一小時到半日, 老師每日都有同媽媽通電講佢嘅進度, 總括佢食野都好乖, 不過要老師餵, 如厠方面去洗手間都肯weewee, 唱歌講故事環節都投入只係間中休息時間會喊搵媽媽, 同埋做勞作未有耐性去做…..返學一見到校巴就開始喊, 放學就笑住落車!

媽媽接天諾放學就試得多, 呢個星期六爸爸帶天諾來接媽媽放工, 天諾好興奮同好奇咁响媽媽個office走來走去, 仲話下次再來tim~~

爺爺六十大壽

朝早返完學, 下午眠一眠, 夜晚去爺爺壽辰晚宴, 可能晚宴場地寬敞姑姊又有禮物送俾佢,天諾特別開心,走來走去, 又搵爺爺敬酒, 又大大聲唱生日歌仲幫手派生日蛋糕, 不過唔知係咪玩得開心得滯唔記得去洗手間, weewee在地上,真係失禮晒:p

開學喇~~

呢排好忙未有時間update個blog, 但有好多野想講呀! 因為天諾開始返新嗰間幼兒園, 第一日返學遇著8號風球, 停課一天, 8月6號仲係天行生日, 唱生日歌係天諾強項, 祝細佬快高長大, 身體健康!!

講返第一日返學, 有爸爸媽媽陪住返1小時實習課, 天諾完全冇問題啦! 睇吓佢d表現, 雖然有d怕醜, 但都有表情架!


第二日返學, 只有媽媽陪佢返, 表現都好叻呀, 識得答老師嘅問題同好主動, 媽媽第一次同佢搭校巴, 初初天諾以為自己坐, 一上車就喊咗出來, 不過媽媽同佢上車之後就冇喊, 仲識得叫同學仔唔好喊tim~~

第三日爸爸媽媽送天諾返學, 天諾要自己上堂, 入課室時天諾喊晒, 接放學時爸爸媽媽入課室見到天諾好乖坐响自己個位度玩玩具, 不過見到我哋就喊咗出來, 喊一兩聲就冇再喊~~ 就係咁幾日嘅實習期完結喇~~

介奶?

自從病咗呢一星期天諾一滴奶都唔肯飲, 可能食嗰隻抗生素係白色太似奶, 唉!!病後磅吓, 足足輕咗兩磅!! 爸爸媽媽要諗計仔至得, 尋晚同今朝用新玩具引佢, 終於有3oz落肚喇~~

尋晚表表來咗玩, 表表學講野, 天諾同佢傾計, 表表用bb話回應, 好似真係溝通到咁!