夜遊機場

今晚爺爺嫲嫲出發旅遊十幾天, 全家總動員送機, 天諾仲話要搭飛機tim,….大家醫肚之際, 天諾响HK Disney store玩車車好開心呢~~

練手力

天諾踢波一向都有板有眼, 爸爸教佢挑起個波, 佢都識! 當爸爸比賽時天諾响場邊狂叫爸爸, 攪到爸爸d波友都話佢落力呀~~其間自己又搵野娛樂吓, 原來佢嘅手力都大有進步, 大家睇吓~~

低能 / thanks God

呢排發現天諾講多咗”低能”一詞, 其實我哋講野都好小心怕佢學, 但都俾佢學到d “低能”, “算啦”, “激死”, “痳煩”等詞語, 而且仲用法正確tim…….
例如:
帶佢去厕所veevee, 兜咗好耐都冇, 佢會話”算啦”
叫佢做一樣野, 叫極都唔show你, 佢之後會彈一句“痳煩” “激死”
睇Mr.Bean, 會話“低能”, 但又照睇!

今晚對話-->
天諾: Thanks God!
媽媽問: 點解呀?
天諾: 食mum mum要.
媽媽問: 食mum mum要?邊個教呀?
天諾: 係呀! Teacher教!

嘉道理農場

雖然天諾細個時嫲嫲成日帶佢去嘉道理買雞蛋, 不過媽媽都係第一次同佢一齊去, 好熱嘅一日呀, 姨媽成日話帶佢去睇羊咩咩, 搵咗好耐原來果度係冇架, 探咗d懶瞓豬同猴子都好啦!!!

香港廸士尼

响媽媽轉新工前請一日假同天諾去廸士尼, 浩浩蕩蕩一行9人有公公婆婆姨媽姨姨表表, 今次玩得有計劃d, 玩多好多野, 不過天諾去到d室內玩船仔車仔都攬住我哋唔放驚到又唔敢睇晒, 連睇巡遊都要攬實, 直到Daisy出場先好enjoy咁揮手, 真細膽!! 相反表表就冇佢咁驚又會周圍望但冇出聲, 我哋個個都曬到紅卜卜, 今日都算熱, 好彩人唔算太多, 唔駛排隊好快有得玩, 仲有個professional guide指點吓, 所以好好玩~~天諾鍾意嘅野都玩過喇, 佢嘅favorite係馳車天地同popcorn~~ 原本想睇埋煙花但太攰都頂唔住, 早d走去醫肚!!

P.S. 多謝晒Edward哥哥嘅特別招待, 令我哋有個其妙旅程!!

不如買法拉利啦!

今日姨媽姨丈帶咗我哋去海逸食自助餐, 雖然食得好豪, 但都唔係今日嘅重點….經典嘅一句係去咗睇車展時, 行咗1分鐘都冇天諾就話“不如買法拉利啦!!” oh~好似去買玩具咁, 我哋唯有講一句”識貨”

呢張相係等車去婆婆屋企食飯時影嘅, 媽媽話天諾唔笑時係最似爸爸!!睇吓佢哋個咀~一樣架!!

~~母親節快樂~~

今朝天諾7點鐘就起咗身, 一早就約公公婆婆姨媽姨丈飲茶, 飲完茶都係10點鬆d, 想行下街鋪頭又未開, 最後去咗婆婆屋企踏單車同餵魚魚, 返屋企瞓醒覺再同嫲嫲食buffet,爸爸點解細佬咁似你嘅?

第一份母親節禮物

星期五放工返到屋企, 剛午睡完嘅天諾就同媽媽講”Happy Father’s Day” 一定係學校教佢講, 哈哈~~笑c人喇成日將mother同father掉轉, 不過媽媽都一樣咁開心, 之後仲即刻走去拎書包嘅手作送俾媽媽, 好warm啊~~~夜晚同太嫲食飯, 坐唔定嘅佢成日想周圍走, 跳舞表演又瞓晒落地, 要捉住佢真係有d吃力喇~~

好有哥哥典範

今晚表表來搵佢玩, 天諾一見到佢又攬又錫, 仲讓愛俾架車仔表表玩, 差不多識行嘅表表拖住天諾已經企到, 我哋拖住一齊跳舞, 最溫馨係叫天諾餵表表飲奶奶, 佢義不容辭咁伸手去幫, 到咗自己攰就叫媽媽幫手, 不過媽媽冇出手佢都頂住, 直至我哋叫佢放手先離開岡位, 今晚嘅表現稱得上哥哥喇~~~

V字手勢好難做啊

今日同公公婆婆姨媽姨丈飲茶, 爸爸病咗, 天諾同姨丈報告話”阿傑發燒”(佢梗係聽到媽媽响屋企講電話學識講喇), 仲有最好笑同佢影相見到d姐姐做V字手勢佢又學, 但就整來整去都做唔到, 一路試做一路個口都冇合埋好好笑呀~~

之後媽媽帶佢去婆婆度踏單車, 餵魚魚, 好熱嘅一日呀, 下午諗住返屋企沖涼後開埋冷氣瞓返覺好嘅, 點知佢又氹又鬧都唔瞓, 第一次鬧到佢喊呢, 但都唔成功, 攪到成5點先有得瞓吓~>p<~

This is "I"

今朝帶天諾去將就讀嘅幼兒園註冊, 去到天諾冇反感仲周圍撩其他同學仔, confirm咗來緊嘅返學時間會同媽媽返工時間差不多, 早上8:30上校巴, 下午5:30落校巴, 對天諾來講真係特特訓呀, 天諾加加油呀!!
夜晚同爺爺嫲嫲叔叔嬸嬸一齊食飯, Ian做咗佢個玩具俾佢周圍推~~
返到屋企玩爺爺買嘅白版, 天諾不經意咁寫咗一畫, 然後話呢個係”I”字, 嚇得媽媽同auntie Alma大讚佢. 即刻拍video俾大家睇吓!

Hello Uncle Auntie

星期五晚帶咗天諾同媽媽d朋友食飯, 平時嘅開籠雀一開始介紹時有d怕羞, 之後就唔俾人傾計要個個聽佢唱歌, 最好笑係auntie Sara著件花花衫天諾對住佢又攬又錫,小花叔叔係同佢玩車嘅partner, auntie Joan成日示範不雅動作攪到佢學晒(返到屋企提起auntie Joan就記得個動作tim……..uncle Kirk迫佢叫哥哥, 天諾唔願意就範, 索性唔叫hahaha~~