Pixar show@ Shatin

講咗好耐爸爸話要帶佢哋去睇下! 兩兄妹見到咁多三眼仔同咁高既woody同巴斯光年high晒嚷住要入場玩~~不過入到場……..唔係一大班公仔亦冇野俾佢哋玩, 似乎興奮度大減, 爸爸媽媽至在俾佢哋見識吓! 臨走前俾佢哋去埋兒童天地玩埋先走, 好抵呢!

放假先來病!

4天假期去到第三日爸爸同妹妹都病倒了, 兩個都微燒, 好彩今日有醫生睇, 但天諾又扭計要跟叔叔去沙灘, 所以我哋兵分兩路, 叔叔幫手帶住天諾去玩, 爸爸媽媽帶天穎去睇醫生…..唉!感冒未清….又要食幾種藥……….爸爸媽媽見到覺得好可憐啊~~不過天穎食藥就好興奮開心, 食藥坐定定一支接一支咁食! 爸爸戴口罩佢又戴埋一份!

講番天諾, 叔叔話佢好乖, 肚餓仲自己”扒”晒成盒飯….雖然除咗天行, 天諾完全唔識天行的同學仔, 但天諾都有滆入去玩, 玩挖蛋遊戲前影張大合照, 哈哈天諾畢竟是高一年級………睇落去已冇晒B味喇~~ 第一次响沙灘玩挖蛋, 天諾似乎冇從入手, 行行企企實搵唔到蛋啦~~最後都係要爸爸出馬呢!

復活蛋製作@RHKYC

嫲嫲為三個孫準備嘅復活節節目! Very nice呀~~第一次用真嘅食材自己decorate復活蛋, 天諾天穎超開心, 有咁多candies仲一邊食一邊整, 天穎每次吱到cream出來都超開心……….至於天行呢…..有點怕醜………唯有出年再來啦!!

踢波日

今日食過早餐跟咗叔叔去踢波, 跑吓運動吓, 出一身汗!! 不過烈日當空, 媽媽有點頂唔順~~雖然只係個幾鐘, 但都覺得好夠……..

三個難得嘅合照 !!

迎接復活節假期

今日好開心天諾N班同學仔Summan邀請我哋去佢別墅house warming, 地方之大俾小朋友上上落落自娛, 哈哈~~媽媽又可以同同學仔媽咪交心一番! 食完野玩一輪後, 媽媽準備咗復活蛋(勞作蛋)俾佢哋尋……一叫之下一班小朋友好齊心咁玩, 尋完蛋仲有問答環節, 佢哋嘅attention都唔錯! 再响花園畫吓尋返來嘅蛋! 話咁快就過咗一個下午, 每次gathering要散的一刻不論小朋友定媽媽都好依依不捨呀!! 多謝Summan family的招待!!

去完gathering之後, 我哋趕去同嫲嫲食飯! 仲有復活節蛋糕食呀!!

Easter Egg hunt + Adventure Zone @AMC

今年由於天氣關係, Easter Egg hunt活動由outdoor轉去indoor playroom, 天諾依然咁開心參與, 今年成績15隻, 算好好喇~~

尋蛋固然開心, 但去adventure zone喪玩亦是今日重點呀!! 記得上次hei hei同學仔生日會, 天諾已好想玩呢個玩意, 今日好主動要試第一次, 佢肯試新野嘅膽量確實令爸爸媽媽大讚!!

至於唔識驚嘅妹妹, 玩超長既滑梯, 一玩連續三次…….媽媽陪佢玩到攰晒………..之後拉咗佢去同Ian玩波波池…超開心呢!! 最後哥哥玩繩網, 妹妹跟足全程………

兩小時喪玩時間好快就過! 回程兩個榭晒!

叔叔新車

今晚外出食飯同叔叔慶祝新車落地, 天諾天行上完英文未食得飯去咗爺爺度踢波, 出一身汗爽呀!!

乒乓球第二課

今晚帶天諾上堂留低妹妹响屋企, 哈哈!天諾上堂時爸爸媽媽偷懶去咗食飯鬆一鬆, 返來後見到天諾好開心上課, 雖然姿態仍然生硬, 但接到幾球已有進步喇!!

沒有工人的日子

11天沒有工人的日子完結喇! 爸爸媽媽輪住放假照顧哥哥妹妹, 今晚大家都好似放下包袱一樣, 全職媽媽/ 爸爸真不易, 所以平時Auntie Alma的功勞是功不可沒架!!
今日天穎老師打電話來傾番學校發生既事, 話說天穎有個同學仔好鍾意坐Tia個位, 試過兩次推開Tia攪到佢喊……老師話已專登分開佢哋坐, 希望個incident唔影響天穎返學情緒! 不過咁啱呢兩日天穎換校服時喊, 唔知有冇關!

有哥哥接放學的妹妹

今日撞啱天穎嘅校巴早咗到, 天諾可以接到妹妹放學, 兩個相見都超開心呢~ 今晚晚飯去咗叔叔度”痴”飯食! 難得三個坐定定睇電視即影低啦!

新課外活動

有見天諾對打乒乓波好有興趣, 平時我哋只會同佢响屋企打地波, table tennis變咗floor tennis! 見有course咁平($110有10堂)就即管俾佢試吓~~今日第一堂仲帶埋妹妹去見識吓!! 天諾呢堂表現平平, 見佢d姿勢同ball sense都有待改進~

妹妹的新學校生活

4月1日第一日新學校的生活只返1小時, 爸爸媽媽帶佢返學, 當班主任接佢入課室時, 天穎喊咗一陣, 老師話氹佢幾分鐘已冇再喊喇~~叻叻!! 4月4日星期一工人開始放11日既大假, 因為接送問題媽媽要求學校將天穎的適應期縮短, 所以呢日正式坐校巴返學喇~~由下午班轉上午班仲要8點鐘要上車, 我哋都好擔心天穎難適應, 不過妹妹好叻叻, 雖然媽媽7:30鏟醒熟睡的天穎, 但佢冇發脾氣仲好樂意換校服, 揹上書包仲好興奮咁催媽媽出門口tim~~ 呢個星期天穎好叻呀, 雖然上車時天穎坐低後有喊一陣, 但老師話佢响學校表現好好. 第一星期comment如下: 上課時冇喊, 同Miss Assa溝通有反應, 食茶點自己食, 身邊同學仔唔食佢仲識叫人哋食, 又幫人抹咀! 返到屋企, 講得出每日食過嘅茶點, 好叻叻呀!!

清明節登高去

同往時一樣, 一早出發去拜山, 未識得幫手嘅細佬除出值支持外, 仲幫手食燒肉雞! 兩位咬住叉待食個樣好好笑啊!! 落山後再响涼亭食嫲嫲準備嘅愛心午餐呢!

HK birthday party + BBQ@上水

HK4歲生日會, 好開心順道同媽媽d舊同事聚吓~~小朋友一齊玩, 熱熱鬧鬧玩一輪, 再天才表演一番就切蛋糕........transformer蛋糕好靚, 例牌蛋糕出場小朋友都哄住, 唱過幾次生日歌加大合照後就食lu...............由於我哋趕住參加下一場BBQ, 生日會未結束就要走喇~~真係sorry呀!!

爸爸d學生好有心, 準備咗煙花, 沙炮同孔明燈 俾幾個細佬玩! 天諾對孔明燈最感興趣, 不斷講hot air balloon呀! 見佢咁有興趣, 媽媽即同佢解釋原理, 哈哈~~呢d係咪活動教學呀!!