Christmas camp@ Kidnetics

餘下假期時間, 媽媽有見天諾手腳協調一般, 所以幫佢報咗五天kidnetics嘅course俾佢玩吓體操同武術…………哈哈第一堂完咗佢”紮馬”俾媽媽睇, 似模似樣wor! 每日上完都好開心同媽媽講番玩咗d咩, 有平行木, 跳aerobic, 做啦啦隊, 跳彈床, 攀石, 玩海綿池…等等…….辛苦晒爸爸每日接送呢!

Happy Christmas Holidaysss

今個聖誕好充實, 由平安夜到boxing day都節目豐富, 先來24號到媽媽公司開party, 聞名不如見面, 兩兄妹出名鍾意食野, 結果哥哥食咗大半碟菠蘿腸仔, 嚇親d Uncle Auntie呢! Party過後就去咗搵爸爸d學生BBQ, 同場有個8歲嘅哥哥好照顧天諾, 大家都玩得好開心~~

25號參加咗羅總攪嘅party@ Langham Hotel, 個party嘅食物好正, 不過兩個細佬當然係對禮物同遊戲興趣大d啦~~响玩踩波波遊戲, 由於天穎俾d汽球爆聲嚇親半路中途棄權, 而天諾呢踩來踩去都踩唔到又開始發脾氣, 好彩不論勝負都各有禮物je………最好笑係完咗party兩個b都好鍾意頂party帽仲帶著走tim…….不過離開酒店向海運出發時, 妹妹竟然強迫媽媽响條街度戴, oh~~媽媽真係未試過呢!!

之後就去叔叔度開劉氏Christmas party, 接過一份又一份禮物, 食過火雞就到例行動作, 切爸爸生日蛋糕+聖誕蛋糕, 哈哈由於呢個已經係爸爸第三個生日蛋糕喇, 所以蛋糕一出場, 天諾就話”吓~又係爸爸!” …..但最後都照唱生日歌同食晒個蛋糕喎, yummy!

26號爸爸媽媽膽粗粗帶住天諾天穎自己一家入迪士尼玩呀~~多謝Edward叔叔帶我哋入場呢!! 今次天諾進步好多好雀躍玩馳車天地, 睇parade又唔怕企第一排, 亦終於肯入巴斯光年館不過入到去就唔敢開眼呢, haha~~至於天穎就咩都玩咩都唔執輸,樣樣都好enjoy呀, 但唯一叫佢同愛麗斯影相就有d怯~~哼!今日兩大湊兩細都handle到wor, 可以再encore呀!!

日間完咗一日行程, 我哋join天諾N班同學嘅party, 因為怕天穎攰, 所以先帶佢返屋企, 之後就帶天諾出發喇~ 可能天諾玩咗一日較攰, 所以比較扭計, 唉!同同學仔玩又成日郁手郁腳, 好粗佬呀~~到咗表演時間同抽禮物就係各小朋友最期待最開心喇~~~開心愉快嘅聖誕節就完滿結束lu…………

爸爸生日

今日帶咗兩個b去DanRyan慶祝爸爸生日, 哥哥食飯算乖坐定自己食, 妹妹呢坐唔定周圍郁, 食完飯剛好商場有個show睇, Tim仲好開心聖誕老人派咗兩包糖俾佢呀! 食完野行個圈就返屋企切蛋糕, 兩個最開心係快d唱完鬥快吹爉燭啊~~

嘉年華@HAECO

早在兩個月前姨媽姨丈已為兩兄妹安排好呢個節目, 哥哥妹妹對飛機冇咩興趣, 而嘉年華嘅攤位就玩得好開心, 最攪笑係撈金魚, 天諾同表表都撈唔到, 反而妹妹自己撈到兩條呀~~叻叻!!

太公~~~一路好走!

放低咗個幾星期未update個blog……因為未有mood同時間, 上星期日去完同學仔party後收到一個極壞嘅消息~~~嗚~~嗚~~太公~~~一路好走!
爸爸媽媽安頓好兩兄妹後即晚回鄉為太公守夜, 呢晚係爸爸媽媽第一次一齊離開屋企overnight, 平時如果夜返屋企, 哥哥都會扭吓計不過解釋後佢好明白而批准爸爸媽媽出門口!!
呢晚媽媽心情沈重, 成晚都想起媽媽兒時與太公相處嘅情景, 如坐太公電單車車尾去飲茶, 响舊屋太公坐”龍椅”睇住我哋玩, 去荔枝園………………呢d記憶永遠留在心中………….
儀式完成後, 太公入土為安! 太公我們永遠懷念您!!

返到屋企, 兩兄妹高聲歡迎爸爸媽媽, 爸爸媽媽急急腳去沖涼, 之後抱吓兩個~~oh…..攪咩兩個都流鼻水既! 即晚兩個都要食藥, 哥哥第二日冇事, 妹妹呢星期三發燒, 唉~~好邪!次次爺爺嫲嫲去完旅行返嚟果日兩兄妹總有一個病既! 不過妹妹好強唔駛睇醫生, 一日時間已冇再燒, 不過鼻水長流, 用3日時間先收咁d鼻水……..可憐既妹妹抹鼻水攪到鼻仔紅晒啊~~

天穎兩歲喇~

今日好忙碌, 首先帶天諾去drama course exam, 係天諾考第一個公開試呢!! 話都冇咁易就攞咗Trinity Guildhall Drama & Speech Examination (GOLD), 沙紙一張填吓報小學嘅portfolio …….至於天穎就係playgroup最後一課, 同朋友仔和老師say goodbye後就準備一月份第一次上學去!

中午食個快餐後出發去迪士尼酒店玩吓, 今日約埋表表一齊同妹妹慶祝, 先來玩玩迷宮, 再去草地吹泡泡, 跑跑跳跳遊一遊就去playroom再玩, 天穎鍾情煮飯仔, 而哥哥呢出奇地填色填咗半個鐘!! (上面有張相妹妹扮表表扁咀, 好攪笑呢!)

今日無需消費就玩咗一個下午喇~~响玩緊嘅時間, 天諾問爸爸媽媽送咩俾妹妹, 爸爸媽媽答”唔駛買野架, 妹妹有一家人陪佢就好開心喇”, 聽完天諾居然走去問妹妹”去玩 具反斗城買玩具俾你好唔好?” 妹妹即答好呀, 天諾就即時向爸爸媽媽滙報! 當然爸爸媽媽再次解釋一番, 天諾最終都放棄買玩具lu~~

而夜晚一家人响屋企同妹妹切蛋糕, 不過今日既蛋糕係由哥哥幫手鋪上士多啤梨同提子乾, 製作過程好攪笑, 哥哥一邊鋪, 妹妹一邊執來食, 哥哥眼見妹妹攪玻破壞而自己又唔捨得食……..個樣好無奈超好笑呀!!! 不過最後都出手推跌妹妹呢! 但好快又開開心心一齊切蛋糕~~ 哈哈, 見到佢哋有喊有笑, 識一齊玩真係好感動啊!!

冬天到, 吃火鍋

呢一兩星期, 天諾學校教嘅topic都圍繞冬天. 難得呢兩日凍d, 就响屋企打邊爐...........其實一向都怕屋企打邊爐有細佬响度會好危險, 特別係怕咗妹妹攪攪震, 所以今次第一次一家四口吃火鍋呢!!!

p.s.今晚天諾好乖自己做好功課等媽媽放工, 實在難得呀~~平時如果有中文功課, 天諾都唔願自己完成架, 如果晚晚都係咁媽媽就安樂晒lu~~~

宇一Birthday Party@ Kidnetic

呢個生日會可以用喪玩, 喪走, 喪跳來形容, 兩兄妹一去到做咗甩繩馬騮, 各自去explore新玩意,兩個都勁鍾玩個跳彈床, 好快兩個都變咗濕水雞仔lu……….天穎好攪笑, 見到宇一妹妹出場即刻捕住觀察一輪跟住就action同佢玩, 估唔到未到半歲嘅bb妹妹俾咁好反應天穎啊!! 多謝Doris姨姨俾咗個盡慶嘅下午我哋呀~~
離開時, 因爸爸去咗踢波, 所以媽媽獨自帶兩個返屋企, 佢哋仲乖乖肯排隊等媽媽幫佢哋沖涼, 真抵錫呀!

p.s. 有見天諾d手腳協調唔太好,來緊嘅聖假期媽媽安排咗天諾响kidnetic上5日christmas camp, 希望佢鍾意啦~~

內疚的一天

今日係天諾Drama course觀課日, 爸爸媽媽居然冇留意到, 媽媽抱住妹妹送咗哥哥入課室就因妹妹扭計大喊而急急腳走人, 但今日接放學後天諾第一時間嘟起個咀向媽媽投訴”全部同學都有爸爸媽媽入來睇, 得我冇” …….oh~~ 聽到…..爸爸媽媽都好內疚呀!!點會咁失察架!!!!! 即刻打電話俾centre問仲有冇下次…….可惜錯過咗嘅機會係返唔到轉頭,下星期就exam, 咁呢個drama course就完成lu~~真係太可惜喇~~~為咗氹番阿仔, 我哋第一時間帶佢去玩具反斗城, 天諾揀咗呢架monster mater, 開心番晒!

下午媽媽單拖帶佢去Edward叔叔度燒野食, 先上樓集合, 估唔到對住咁高嘅露台, 阿仔一d都唔驚,之後去燒野食(好彩之前買咗架車仔氹吓阿仔, 唔係得佢一個細佬實閒親佢), 佢心情大靚, 不斷將架車放响唔同地方要媽媽同佢影相!